ORANJESTAD – Conservacion di monumento ta un di e responsabilidadnan cu ta na encargo di Minister Maduro di Cultura. Durante september cu ta luna dedica na monumento na Aruba, e mandatario ta brinda informacion riba e trabounan di restauracion di monumento cu a wordo haci bou su encargo na bienestar di comunidad.
Zuidstraat 7, Bestuurskantoor y Maria Convent
Bou liderazgo di Monumentenbureau tres edificio di balor monumental a keda restaura. E cas situa na Zuidstraat 7 a keda restaura y ta forma parti di expansion di e edificio di Aruba Investment Bank. Monumentenbureau a guia y restaura e edificio monumental di Bestuurskantoor cu a wordo entrega na Gobierno aña pasa. E restauracion di Bestuurskantoor a keda ehecuta riba un nivel hopi halto y ta cumpli cu e reglanan pa edificio monumental. Monumentenbureau a prepara y ta guiando e restauracion di Maria Convent cu lo bira e Facultad di SISSTEM na Universidad di Aruba.
Uncle Louis Store, Forno di Calki, Cas Tan Tin y Botica Aruba
Monumentenfonds a percura pa restaura edificio di Uncle Louis Store na San Nicolas completamente y di un manera duradero. Na Oranjestad Monumentenfonds a restaura e Forno di Calki cu pa añanan largo tabata den mal estado. E restauracion a bay combina cu un curso di tecnica di uzo tradicional di calki pa mantencion di edificionan monumental. Despues di restauracion di e Forno di Calki, Monumentenfonds a pone e monumento na disposicion di Stichting Rancho, pa e forma parti di e tournan den Rancho. Asina por educa e comunidad tocante e monumento industrial unico aki. Aña pasa Monumentenfonds a cumpra Cas Tan Tin, cu ta e prome cas di cunucu riba e lista di monumentonan proteha pafor di capital di Aruba. Fundacion Mi Cutisa ta maneha Museo Cas Tan Tin cu ta situa na Pos Abou 19. Ademas e aña aki Monumentenfonds a inicia cu restauracion di e edificio conoci como Ex Botica Aruba.
