Home Politics Premier Evelyn Wever-Croes:  SDGS TA UN GUIA PA NOS YEGA NA UN...

Premier Evelyn Wever-Croes:  SDGS TA UN GUIA PA NOS YEGA NA UN MIHO NIVEL DI PROSPERIDAD PA UN Y TUR Y DEN HARMONIA CU NATURALESA  Hunto pa e SDGs

SHARE

Prome Minister Evelyn Wever-Croes a manda un mensahe di video di saludo y felicitacion na Nacionnan Uni en conexion cu e di prome lustro di e Metanan Mundial pa un Desaroyo Sostenible (SDGs) di Nacionan Uni. Diabierna 25 di september, paisnan rond mundo ta celebra e prome 5 añanan di SDGs cu un conmemoracion di bandera y na Aruba tambe e bandera di SDGs ta wordo hisa conhuntamente y den solidaridad cu otro paisnan rond mundo pa nos para keto na e importancia di e agenda 2030 di Nacionnan Uni y e Metanan Mundial pa un Desaroyo Sostenible (SDGs).

 

COVID-19 ta recorda nos di e necesidad pa mundo henter traha hunto den bon colaboracion. Solamente trahando hunto nos por construi un mundo mas sostenibel, mas husto y inclusivo. 

 

SDGs ta un plan pa yega na un mundo sostenible y inclusivo pa 2030 y cu a wordo aproba cu sosten di tur miembro di Nacionnan Uni na 2015. Gobierno di Aruba tambe ta respalda e SDGs y ta mira esakinan como un guia pa nos yega na un miho nivel di prosperidad pa un y tur y den harmonia cu naturalesa. 

E aña aki Nacionnan Uni no solamente ta celebrando 5 ana di SDGs pero tambe, 75 aña di existencia di e organo mundial aki. Tur dos ta mas importante cu nunca pa asina nos por logra un futuro cu nos kier. Gobierno ta apoya e SDGs fuertemente y ta uni su mes na e Decada di Accion pa implementa e SDGs cu ta #hunto pa #SDGs.

Pa Aruba tambe e Metanan Mundial pa un Desaroyo Sostenible ta un prioridad. Den Aruba su plan di Gobernacion, henter coalicion a compromete su mes na implementa e SDGs.  Asina tambe, una biaha mas Gobierno a demonstra su compromiso na e SDGs na inicio di Gobernacion ora cu na januari 2018 a reinstala e comision di SDGs cu ta encarga pa duna direccion strategico y implementa e metanan di desaroyo sostenible na Aruba. Na Augustus 2018, Gobierno a aproba e Roadmap pa implementacion di SDGs. 

E desaroyo di e Plan Strategico National (NSP) cu a wordo coordina dor di DEACI y entrega na Gobierno na inicio di 2020 ta tuma SDGs como punto di salida. 

E pandemia di COVID-19 a retrasa e avance di SDGs y e crisis a magnifica e desigualdadnan existente y con esaki a afecta e personan mas vulnerable di un forma desproporcional. P’esey mes Gobierno su plan di recuperacion “Resetting our Sails” a wordo desaroya di un forma participativo pa inclui tur hende den e proceso di recuperacion y ta reconoce e necesidadnan pa bin cu cambionan structural na unda e principio di innovacion ta central pa trece e cambionan necesario y di un forma acelara. E plan aki ta estrechamente liga na e SDGs y pues ta enfoca riba y ofrece solucionnan pa crea un comunidad mas husto y inclusivo na unda e ser humano ta keda central.

Mescos cu mundo ta celebrando e SDGs, Aruba su respuesta na e retonan nos dilanti mester ta uno uni y na unda ta invita henter comunidad, incluso e sector comercial y NGOs,  pa hunto nos enfoca pa desaroya solucionnan innovador cu lo yuda nos pa yega na realisa e SDGs. 

Parando keto na e logranan di Nacionnan Uni, un organisacion internacional cu a wordo lanta  despues di segunda Guerra Mundial cu e meta pa mantene paz, siguridad internacional, desaroya relacionnan estrecho y amical entre paisnan, promove derechonan humano y progreso social pa un miho nivel di bida pa humanidad. 

Pa prome biaha den historia di Nacionnan Uni, COVID-19 ta trece un crisis na nivel mundial, ta mustra nos cu solamente poniendo enfoke riba e principionan pa cual Nacionnan Uni ta para p’e y cu sosten di tur hende, Gobierno, sector priva, NGOs uni hunto, enfoca riba e posibilidnan cu SDGs ta Brinda, nos por crea un miho mundo pa hender humanidad y nos planeta.