Home Politics Parlamentario Edgard Vrolijk: Ley di integridad pa ministernan ta cla

Parlamentario Edgard Vrolijk: Ley di integridad pa ministernan ta cla

SHARE

Cu hopi orguyo mi ta informa pueblo cu e ley di integridad pa ministernan ta cla y cu pronto lo por ser trata manera tabata e caso di e ley di financiamento di partidonan politico. Asina a cumpli cu locual nos partido MEP a bay campaña cune y sigur una bes cu e ley aki pasa nos camber di integridad ta cla pa cuminsa funciona paso nan tin na nan disposicion e aanbestedingsverordening, e ley di financiamento di partidonan politico y e ley di integridad di ministernan.

E ley di integridad di ministernan
Despues di a pasa no un pero dos biaha na Raad van Advies y tur dos biaha a haya dictado tremendo, awo e ultimo ahustenan conforme e consehonan ricibi a ser ehecuta y awo a manda esaki DWJZ pa e ultimo control tecnico pa por presenta esaki na Parlamento pa ser trata. Esaki lo por tuma lugar den e siman di 28 di september dependiendo e agenda di parlamento.
Un ley cu lamentablemente di 2016 ya mester tabata aplicabel pero no a ser ractifica pa motibo di cambionan fundamental den e ley pa por acomoda un Minister cu e tempo ey di partido AVP tabata sera. Y sigur na momento cu mi a drenta como parlamentario a traha riba esaki pa nos isla no ser poni nunca mas na berguensa den reino.
E ley aki lo percura pa transparencia y sigur lo empedi conflictonan di interes pero sigur unda cu pueblo por sa con un gobernante ta yega na su bienesnan.

Siguiente proyecto
E siguiente proyecto cu mi persona hunto cu parlamentario Hendrik Tevreden lo ta cabando cune ta e reglamento di ordo nobo pa parlamento. Uno sigur cu lo haci e trabaonan mas efectivo unda reunion por cana hopi mas liher, pero tambe cu lo percura pa parlamentarionan respeta e entidad di parlamento, cu pueblo a escogenan pa traha y acudi na trabao y sigur e muchachada di ken mester forma quorum ta cos di pasado. Paso tur 21 parlamentario ta ser paga igual y ta pueblo a escogenan pa representanan y ta placa di pagado di belasting ta paga nan salario y nan por mustra respet na pueblo di yega trabao y percura pa reunionan cuminsa na ora y no tin discucion mas ken mester tene quorum paso esaki ta responsabilidad di tur 21.

Den esaki mester trece cambio den nos constitucion y mester 2/3 di parlamento pa esaki por ta posibel y pueblo por wak di biaha ken ta traha na bienestar di pueblo y ken ta sirbi su partido y su mes.
Pa termina mi persona ta para fuerte pa fortifica nos sistema democratico y sigur pa percura pa den un futuro ora pueblo bay urna e por tin e confiansa cu bagamunderia di pasado no lo ta posibel mas.