Oranjestad – Diasabra den oranan di merdia pa atardi a cuminsa circula ariba social media un comunicado bisando “Consensual black out of restaurants and bars on Aruba”.
Esaki tin di haber cu e desicion tuma door di Gobierno di Aruba un dia anterior(september 18), relaciona cu e sluitingstijd di establecimientonan lo ta 9or, enbes di 11or. Toque de Queda a wordo hala di 12or pa 10or di anochi ocasionando cu e ora pa cera ta cambia.
Aki ta unda e sluitingstijd no a cay nada bon cerca algun comerciante den e mundo di Horeca cu ta restaurantnan y algun bar.
Segun e comunicado manda ultimo ora diasabra atardi, Financial Adviser lo a scirbi cu Aruba y su hendenan ta un di e luganan na mundo cu Covid-19 mas a afecta seriamente.
” Nos kier informa cu mayoria di comerciante di restaurant y hospitality, y nan tremendo crew ta desapunta cu gobierno a dicidi di duna nos industria un sla asina grandi door di sera 9pm”.
Segun e comerciantenan: “Debi na e decision aki, nos ta haya nos mes forsa ta cera entrante awe(diasabra) 6or di atardi te proximo aviso.
Gastonan di operacion ta hopi halto caba segun e comunicado.
Si y cuando gobierno dicidi di keda implementa medidanan drastico, nos como doño di restaurant ta obliga di retira nos empleadonan for di servicio.
Sin e entrada aki nos empleadonan ta haya nan tin cu depende di asistencia social (p.e. bijstand), e comunicado via Social Media tawata bisa.
Nan deseo ta pa Gobierno pone e sluitingstijd bek na 11or di anochi, por lo menos pa awor.
E comunicado a termina bisando: ” Nos ta spera y ta resa cu nos Gobierno di Aruba ta honra nos peticion, pa asina nos por mantene un ambiente di trabou safe y saludable pa nos empleadonan por cria nan famia, paga impuesto y biba den harmonia riba e isla aki.
Ariba e strip di high rise hotels por a mira tanto Gerencia como empleadonan di varios negoshi para canto di caminda of sinta, expresando nan preocupacion y sosteniendo nan dunado di trabou.
