Home Interviews VIDEO INTERVIEW: Droga, industria sexual, traficacion di hende muhe y “secuestro”...

VIDEO INTERVIEW: Droga, industria sexual, traficacion di hende muhe y “secuestro” pasando aki na Aruba

SHARE

Na Aruba mescos cu tur parti di mundo, e mundo di adiccion di droga ta un mundo completamente riba su mes, un circuito hopi baho y cera. Si bo no a pasa den bo no sa kico tur ta pasa den e mundo baho aki.
E  bida di un persona den adiccion no conoce, alegria, no conoce husticia, no conoce amor, fieldad etc. e conoce solamente tur locual ta dolor, sufrimento, angustia y abuso den tur forma.

Durante cu un persona ta un adicto di droga, e ta experiencia hopi violencia sexual, abuso fisico, traficacion di hende y te hasta secuestro. Tur esaki ta pasando bou nos wowo y niun hende ta wordo persigui, pa motibo cu e victima ta “djis” un  adicto. Pa e mundo “drechi” un adicto no tin balor, e no ta conta paso e ta den un mundo di perdicion. Esaki ta locual un ex-adicto a expresa ora e a conta nos di su pasado den e mundo baho aki.

E mundo di droga na Aruba den cierto sentido por compar’e cu locual nos ta mira den peliculanan riba pantayanan di cine. Por ehempel un dama hoben ta cay den droga y ta wordo secuestra, drogá y hiba di un cuidad pa otro. E famianan ta perde nan yiu of ora nan haya nan yiu bek, nan ta hay’e den un estado fisico hopi deplorabel y debil. Den cierto peliculanan nos por a mira con hobennan ta wordo bendi y usa como esclavonan sexual. Tur e actonan aki den cierto sentido tambe ta pasa na Aruba den e mundo di droga, pero den un circuito mas chikito y cera.

Mayoria di adicto ta cuminsa cu marihuana y despues di algun tempo, kier bay pa algo mas pisa, paso e marihuana ta bira un custumber y e kier algo cu ta mand’e mas halto. E siguiente fase ta coca y despues piedra, cual ta coca cushina, esaki ta wordo huma.

E prome haltura di huma piedra nunca mas lo bin bek, pero ta crea mesora un adicto
Na momento cu un persona cuminsa uza marihuana, e por keda hopi aña riba marihuana. Na dado momento algo por pasa cu e persona of e por wordo influencia pa un supuesto bon amigo of amiganan pa huma piedra. Una bes un persona purba e piedra, e piedra lo dun’e un haltura cu nunca antes e la yega di experiencia. Esaki ta pone cu e persona lo kier keda uza piedra, pa asina trata na yega na e mesun haltura cu prome bes e la experiencia humando piedra, pero sin sa cu E prome haltura di piedra nunca mas lo bolbe.

Bendemento di ‘fresh meat’ a cambio di droga
Droga no ta gratis, semper den un of otro forma mester paga p’e. Den e mundo di droga semper tin un supuesto bon amiga of amigo cu ta duna e persona coca of  piedra pa e huma, e supuesto amiga of amigo lo keda  supply e persona pa un tempo cu droga, pero despues e persona aki mes mester cuminsa paga pa su droga. Especialmente hobennan cu no tin un entrada pa paga, e supuesto amigo of amiga cu ya ta den e wega di droga, lo percura pa e persona aki sea homber of muher yega den contacto cu un dealer. Aki ta caminda cu e supuesto bon amiga of amigo ta bende e persona inocente y hopi biaha hoben cu un dealer of tambe na un usado cu tin hopi placa of droga. Vooral ora ta trata di un mucha muher hoben y bunita, e dealernan y adictonan tur ta purba pa haya un chens cu e persona cu ta nobo nobo den e mundo di droga. Tambe tin ora e dealernan mes ta cuminsa acerca e supuesto amiga aki, pa e supuesto amiga bendenan e dama hoben aki.

 

E ‘fresh meat’ ta wordo bendi cu dealernan pa poco droga
E supuesto amiga ta bisa e dama hoben “ami no tin mas droga pa dunabo, pero mi ta bay hibabo cerca un persona cu si tin y cu por dunabo hopi mas droga pa bo uza”. Asina aki e dama hoben inocentemente ta bay na e dealer y asina e prome transacion di benta ta tuma lugar. E supuesto amiga of amigo ta haya poco droga pa e sigui uza y e dealer ta haya un persona na su disposicion pa e haci tur locual cu e desea cu ne, e persona aki nan ta yama “freshmeat”.

Un dealer nunca ta perde, e ta saca bon probecho y hopi mas di e dama cu e la cumpra
E dealer lo percura pa supply su ‘fresh meat’ cu cuanto droga cu e ta desea pa e keda bon halto, paso segun nos a compronde for di un adicto, piedra ta hisa bo libido (gana di sex). Un dealer ta tene e dama hoben aki cerca di dje y ta keda duna e hoben aki droga sin perde placa. E costo di e droga cu dealer a paga e supuesto amiga cu ne y tambe e droga cu e ta dunando e ‘fresh meat’. e lo hay’e bek door di prostitui e dama aki.

Ora e dealer no por saca mas probecho for di e persona, e ta wordo benta riba caya
Mas cu claro si e dama ta atractivo mas homber lo kier haya un chens cu ne y ta paga e dealer bon pa nan por uza e dama. E modus operandi aki por tuma lugar pa algun dia of siman y hopi biaha ta pasa den un apartamento, cas of camber cera. Na final ora e dealer cansa di uza e persona of a traha suficiente placa cu ne, e lo deshaci di dje. Asina mes e dealer hopi biaha no lo laga e dama bay facilmente, e lo trata na bende cu un otro dealer pa asina e por haya mas droga. Si e logra bende e dama aki, e siguiente dealer tambe ta bay haci mescos, dus prostitui e dama  aki te ora e tambe cansa. Si e dama ainda por bay un ‘rond’ mas, elo bolbe wordo bendi, pero si e curpa e dama ya no por mas, si e  dama a haya malesa of a bira malo, nan ta djis habri porta mande riba caya.

E bida di un adicto riba caya
Mayoria biaha den un estado deplorabel, door di e tantisimo abuso sexual e dama adicto cu di baina por cana ta wordo manda riba caya. Tin algun di e damanan adicto cu ta sali for di e secuestro aki cu enfermedadnan contagioso y un trauma serio pa bida largo. Mirando tur e experiencianan amargo cu e mester a pasa aden durante cu e tabata bendi y e grado di su adicion, e dama adicto lo sigui bende su mes riba caya, paso e unico cos cu e ta bibando p’e ta e piedra, cu e mester huma pa su adiccion.

Hombernan cu dashi cu tin dobbel bida ta paga adictonan pa drumi cu nan
Un ex-adicto a conta nos cu no ta solamente dealer of adictonan masculino ta drumi cu e adictonan sea femenino of masculino. Tambe cu tin hopi hende di e mundo”drechi”, hombernan cu dashi, cu ta paga un adicto, sea homber of muher pa nan pasa un dia of weekend cu nan. Locual e adicto ta pidi ta hopi mas ta barata cu un prostituta di bar. Esaki pa motibo cu e desesperacion pa droga ta asina grandi, cu nan ta haci cualke acto sexual pa haya poco placa pa cumpra droga. Varios di e adictonan cu ta canando rond riba caya tin malesanan contagioso, door cu entrenan nan no ta uza proteccion.

Gang rape, den edificionan y casnan bandona ta masha ‘normal’ den e mundo di adiccion
Un otro ex-dama adicto a contanos cu nan no ta wordo solamente bendi y viola door di dealernan y nan amigonan. Pero tambe den e casnan of edificionan unda nan ta drenta pa uza droga tambe tin hopi abuso sexual ta tuma luga. Esaki ta sosode na momento cu un adicto sea homber of muher pass out (ta asina halto cu e no por reaciona mas), mesora  e otro adictonan masculino ta para den rij carson baha. Ela contanos cu un adicto cu pass out den un edificio of cas bandona mayoria di bes e ta wordo viola den gang door di otro adictonan masculino. Ora e adicto lanta bek, su curpa ta keda haci hopi dolor, pero sin sa ken of cuanto otro adicto a abusa sexualmente di dje. E parti mas tristo ta pasobra e ta un adicto, e no tin niun caminda di cana pa haya husticia, pasobra pa e sociedad e ta djis un adicto y un adicto cu no tin balor.

Adictonan masculino tambe ta wordo secuestra, bendi, viola y ta prostitui nan mes pa droga
No ta e adictonan femenino so ta pasa den e experiencianan cruel, pero adictonan masculino tambe, nan tambe tin cu drumi of haci cualke acto sexual cu e dealernan pa haya poco droga. Te hasta tin mucha hombernan cu tambe sa wordo bendi pa droga. Pa un ex-adicto of un adicto no ta facil pa papia di e bendemento, e secuestro y e esclavitud sexual cu nan a pasa aden, e ta tuma hopi corahe pa conta un poco di locual nan a mira y nan mes a biba den carne propia.
Arubanative.com toch a logra haya algun adicto y un ex-adicto femenino pa contanos basta habri kico e mundo di droga ta realmente y con devastador e ta pa e curpa di un ser humano.

Adictonan di droga no tin balor den nos comunidad
Locual ta incomprendibel, cu tur violencia sexual, bendemento, secuestro y abuso den tur forma y sentido ta sosode cu adictonan y nada ta wordo haci pa castiga esnan cu ta culpabel di esaki. Esaki ta parce cu ta pa motibo cu nan ta adicto nan ta den e mundo di droga y ta biba riba caya, nan no tin balor di un ser humano pa nos comunidad.

Actualmente tin instancianan, tin “expertonan” studia den e ramo aki, gobierno ta presupuesta tur aña un cantidad di placa den conscientizacion, den prevencion, den publicidad y pa combati droga. Lamentabelmente te ainda tur dia e bendemento, secuestro, abuso y violencia sexual ta pasando bou nos wowo. Nos no sa, si e motibo ta pa falta di mas concientizacion, di mas prevencion of di mas ayudo pa saca e adictonan for di adiccion? Cada adicto cu wordo libra di droga ta un ganashi grandi pa nos comunidad.

Arubanative.com ta spera cu e articulo aki y e testimonionan di e dos personanan aki por fungi como un advertencia pa nos hobennan cu actualmente ta tambaleando y ta dudando pa drenta den e mundo di droga, tambe pa tur cu ta kaweta pa sa kico ta droga, paso prome cu un persona kier pensa e ta un adicto. Piedra ta un purba y un gusta, den no time bo ta bira un ‘fresh meat’ y di eynan ta cuminsa e bida riba caya cu tur e consecuencia cu e ta bin cu ne.