Home Politics Minister Glenbert Croes: Sociaal Crisis plan ta continua

Minister Glenbert Croes: Sociaal Crisis plan ta continua

SHARE

 

Esaki a keda comproba durante rueda di prensa di Minister Glenbert Croes, conhuntamente cu Sra. Glenda Hernandez, Sra. Daphny Tecklenborg y Sra. Sue Ann Lacle Ras, kendenan a elabora extensamente riba e desaroyo di Sociaal Crisisplan. Considerando tur e proyectonan andando, e progreso constata, Sociaal Crisisplan tin derecho di existencia y mester continua pa bienestar social di nos conciudadanonan.

Sociaal Crisisplan a wordo instala pa medio di Gobierno di Aruba na comienso di aña 2018 despues cu dos criatura a perde nan bida inocentemente na fin di aña 2017. Gabinete Wever Croes a percura pa aloca fondonan pa departamento y fundacionnan trahando riba e tema aki den e diferente sectornan. Nos a haya apoyo di parti Unicef cu a ehecuta un estudio riba e situacion social na Aruba indicando e ‘bottlenecks’ cu nos mester atende prome, pa sigura cu ehecucion di SCP tin exito. Tur profesionalnan den e diferente sectornan a bin hunto pa asina coordina e plan di ehecucion di Sociaal Crisisplan. E meta principal di Sociaal Crisisplan ta pa reenforsa e sistema nacional di proteccion di mucha y esnan mas vulnerabel den nos comunidad.

“E compromiso ta: SOCIAAL CRISIS PLAN #SCP lo continua tanten cu tin problemanan social cu mester di nos accion urgente y contundente pa nos por sigura e siguridad y bienestar di tur nos muchanan, tur nos hobennan y tur famianan na Aruba…Sociaal Crisis Plan lo keda e vehiculo pa nos sigura e implementacion di tur e proyectonan den e sectornan: SOCIAL – HUSTICIA – ENSEÑANSA – SALUD”

E prioridad lo keda e famia, como e prome influencia y esun di mas importante den e bida di un muchanan. Pero no solamente pa e motibo ey, tambe pa e hecho cu 2 di cada 3 mucha ta wordo abusa door di un familiar of un bon amigo di famia. P’esey e enfoke y prioridad mester ta e fortificacion di e nucleo familiar, e conscientisacion y e yamada pa no bira cara ora cu bo sa cu un mucha ta wordo abusa y neglisha.

Meta di Gabinete Wever Croes ta pa cada mucha y hoben aki na Aruba ta sigur. “Nos meta ta, elimina e desventahanan social pa tur mucha y hoben y duna nan e paz, trankilidad y e proteccion cu nan tin derecho riba dje”, Minister Glenbert Croes e expresa.