Ex Promer Minister mr. Mike Eman: BAN TENE FE

Bishita den barionan, serenata pa nos grandinan na cas di nos grandinan, trabao comunitario, bishita di scolnan, atencion pa muchanan chikito malo den hospital, esaki ta e variacion di formanan cu mr. Mike Eman y su esposa Doina tanto como Promer Minister y como Parlamentario tabata comparti e dia di su fecha natal cu comunidad Arubano dia 1 di September durante añanan.
E aña aki cu e pandemia cu ta afectando nos comunidad henter y e vulnerabilidad di su esposa Doina e fecha natal di Ex Promer Minister Mike Eman a worde haci den forma di un refleccion nacional comparti pa medio di su pagina social cu henter nos comunidad. Ex Promer Minister Mike Eman a haci un yamada pa un refleccion y oracion nacional pa fortifica e sentimentonan den nos comunidad pa por surpasa e retonan grandi nos dilanti.
Eman a habri su refleccion expresando gratitud na nos Creador pa un aña mas di bida y salud. El a comparti cu Doina cune a manece cu un oracion pa henter Aruba cendiendo un bela den presencia spiritual di su mayornan, nan angelnan wardador den cielo. “Cu Señor su boluntad duna Doina y ami forza pa supera momentonan dificil, cu su Bendicion awe por drama riba tur cu un kebrante di salud y nan famianan, riba nos dokter y enfermeranan trahando di dia y anochi pa yuda cura nos prohimonan y consuelo pa esnan cu a perde un ser keri den e dianan aki”, mr. Mike Eman a comparti. E muestra cu tur cos na final ta cu nos Creador su forza y boluntad.
Eman a pidi pa un refleccion uni cu empathia y compasion, den espirito y hermandad. “Esey ta mi deseo awe pa Aruba henter riba fecha di mi nacemento 1 di September. Ban Tene Fe. Un abrazo cu hopi amor y amistad”, tabata su mensahe final.
Literalmente Ex Promer Minister Mike Eman a comparti e pensamento aki riba su pagina social:
“Amigonan, Friends, Awe hopi gradicido na nos Creador pa un aña mas di bida y salud. Doina cumi a manece cu un oracion pa henter Aruba cendiendo un bela den presencia spiritual di nos mayornan, nos angelnan wardador den cielo. Cu Señor su boluntad duna Doina y ami forza pa supera momentonan dificil, cu su Bendicion awe por drama riba tur cu un kebrante di salud y nan famianan, riba nos dokter y enfermeranan trahando di dia y anochi pa yuda cura nos prohimonan y consuelo pa esnan cu a perde un ser keri den e dianan aki. Tur cos na final ta cu nos Creador su forza y boluntad. Un refleccion uni cu empathia y compasion, den espirito y hermandad. Esey ta mi deseo awe pa Aruba henter riba fecha di mi nacemento 1 di September. Ban Tene Fe. Un abrazo cu hopi amor y amistad [Mike y Doina] #tenefe”