Home Local Colegio EPI ta habri pa studiante cu Protocol COVID-19

Colegio EPI ta habri pa studiante cu Protocol COVID-19

SHARE

Oranjestad — Colegio EPI ta yama tur studiante un caluroso bon bini na aña escolar 2020-2021. Staf y personal tin varios siman di preparacion tras di lomba y a haci nan maximo esfuerso pa por ricibi studiantenan na un manera safe y ofrece e lesnan na e manera mas eficiente posibel. Colegio EPI ta habri e campus pa studiantenan haciendo un yamado pa nan mantene nan mes na e Protocol COVID-19 y duna tur nan empeño durante nan lesnan segun e asina yama “hybridemodel”. Esaki lo ta un forma nobo di enseñansa cu tanto studiante como nos personal tin cu custuma cu ne.

Protocol COVID-19
Esaki a wordo hinca den otro pa seguridad di tur hende riba campus di EPI. E Protocol COVID-19 ta subraya puntonan di higiena y comportacion cu tur studiante tin cu tene na cuenta riba campus y den localnan. Tambe e Protocol COVID-19 ta indica kico e studiante mester haci den caso cu e ta malo of si e haña un test di COVID-19 positivo.

Comportacion
Riba campus tur studiante tin e responsabilidad pa su mes y pa otro, di comporta na un manera safe pa evita posibel contacgio cu COVID-19. Pa e motibo aki nos ta pidi tur pa sigui e siguiente normanan:
* uzo di mondkapje ta obligatorio;
* mester laba man cu awa y habon y/of hand sanitizer prome
drenta local of oficina, prome y despues di come y despues di usa wc;
* tosa y niester den elleboog;
* mantene distancia social di 1,5 meter;
* evita aglomeracion riba campus y den edificionan.

Higiena
Localnan cu no tin un wasbak lo wordo asigna un baño pa asina studiantenan uza regularmente pa laba man:
* HT01-04: baño publico den Edificio B riba campus;
* AI32: baño publico den Edificio C riba di dos piso;
* EI01 & ET02: baño publico den Edificio D.;
* EP20-23: baño publico den Edificio D riba di dos piso;
* SP01-02 & SW03: baño publico den Edificio E;.
* SP22-23: baño publico den Edificio E riba di dos piso.;
* AT05: baño publico den Edificio H;
* AT25: baño publico den Edificio H riba di dos piso;
* WT14 & 17, WP16, WP21-26: baño publico den Edificio L;
* RT 01-05: baño publico den Edificio B;
* RT 06 & 07: baño publico den Edificio E;
* V01-09: baño publico den OLC;
* VZ01: baño publico den stafgebouw.

Aglomeracion
* Aglomeracion di hende riba campus y den edificionan/ localnan ta prohibi.
* Riba campus lo kita te caminda posibel tur stoel cu banki. Esnan cu keda riba campus ta permiti pa no mas cu 4 persona sinta na dje.  * Studiantenan cu subi campus pa sigui lesnan segun rooster mester bai na e local di biaha.
* Comemento mester tuma luga den e local caminda ta sigui les segun rooster.
Food Court lo tin cuminda y bebida pa pick up y delivery so, ya cu e edificio di Foodcourt lo keda cera.
* Studiantenan mester bandona campus directamente despues di a sigui nan lesnan segun rooster
* OLC lo keda ofrece servicio pero cu ocupacion minimo di persona. E entrada pa OLC cu tur studiante mester usa ta esun parti paden di
campus.

Entrada y Salida
Pa evita aglomeracion riba campus y den e edificionan, studiantenan mester uza e Gatenan asigna pa subi y bandona campus y pa yega nan e localnan pa nan lesnan segun rooster:
* Edificio C & H (AT-lokalen) y Collegezaal: Gate 2;
* Edificio K & L (CT/WP- lokalen) y Auditorium: Gate 10;
* Edificio D & E: Gate 8;
* RT-lokalen/ Edifico B: Lobby di Unit H&T.;
* OLC: entrada na parti paden di campus.

Malesa
Studiantenan cu un of mas di e siguiente sintoma mester meld ziek, keda cas y tuma contacto cu nan dokter di cas:
* Niestermento;
* Tosamento;
* Verkoud;
* Dolor di garganta;
* Dificultad pa hala rosea;
* Keintura halto.
Si un studiante bira malo na scol cu un di e kehonan menciona, e mester raporta di biaha cerca su unitmanager.
Segun palabracion cu e unitmanager e por wordo manda cas cu e recomendacion pa tuma contacto cu su dokter di cas.

Positivo pa COVID-19?
Si e studiante test positivo e tin cu tuma contacto di biaha cu su mentor y su unitmanager. E studiante no mag di bin scol y mester sigui tur recomendacion estricto di DVG.
Si un familiar/ amigo/ conoci di un studiante test positivo pa COVID-19 e studiante tin cu avisa su mentor y unitmanager. Den e caso aki e studiante por wordo manda den cuarentena obligatorio door di DVG.

Hybriderooster/ Hybridemodel
Normalmente tur studiante ta wordo poni den un klas y e klas ta sigui les hunto den un local “face-to-face” na scol segun un rooster regular. Esey kier men cu cada les ta wordo duna den un local diferente y e studiante tin cu cambia di local pa cada les.
Pa motibo di e medidanan di seguridad cu mester tuma pa evita contagio cu COVID-19 na scol, e sistema aki mester a wordo adapta na un asina yama “hybride model”. Den e caso aki e klasnan ta wordo parti di tal forma cu tin menos studiante den e local. Un parti ta sigui les na scol den local, mientras cu e otro parti ta sigui e mesun les online. Den e “hybriderooster” cu Colegio EPI a hinca den otro pa aña escolar 2020-2021, e lesnan a wordo programa di tal manera cu tur studiante ta haya e mesun cantidad di les den persona na scol, y online.

Aunke cu e aña escolar aki ta cuminsa full diferente na loke ta custumber, Colegio EPI ta hopi entusiasma pa ricibi e studiantenan cu e siguransa cu e lo bira un aña escolar exitoso. Pero exito ta cuminsa door di cultiva positivismo y pasenshi tur dia. Studiantenan, ban pe!