Home Politics Parlamentario Alan Howell Tin diferente posibilidad pa nos muchanan por sigui...

Parlamentario Alan Howell Tin diferente posibilidad pa nos muchanan por sigui haya les

SHARE

 

 

Parlamentario Alan Howell a comenta riba e decision di Gobierno di Aruba pa habri scolnan bek dia 3 di september. E ta un tema di preocupacion pe mirando e derecho di mucha pa ricibi educacion y e leerplicht cu ta existi na Aruba.

El a indica cu ta varios mayor a acerke cu e preocupacionnan relaciona cu e habrimento aki, specialmente na e momentonan aki cu tin asina hopi caso di Covid-19. E mes a splica cu e ta comparti e preocupacion aki, specialmente teniendo na cuenta eestadisticanan di edadnan di casonan cu tin na Aruba.

Parlamentario di POR a bisa cu e por a compronde cu gobierno, tambe a tene na cuenta e preocupacionnan aki y a yega na un solucion. Alan Howell ta contento di por a scucha for di Minister di Enseñansa cu mayornan por dicidi si nan yiu(nan) ta bay scol personalmente of ta sigui e lesnan na un manera digital of virtual.  Di e forma aki e mandatario a mustra cu e mayor mes lo dicidi con e ta desea pa su yiu(nan) sigui nan les escolar, mientras cu ta sigura cu tur mucha lo haya e enseñansa cu nan tin derecho riba dje.

Cu otro palabra, diahuebs dia 3 di september muchanan den edadnan escolar lo mester cuminsa haya les atrobe, sea na scol of na un manera virtual of digital.

Howell ta haya hopi bon e posibilidad cu gobierno a duna e mayornan pa e muchanan por sigui lesnan for di cas mes (homeschooling), lagando e alumno keda inscribi na e scol. Es decir, si den futuro e mayornan kier manda e mucha scol bek, e tin su luga sigura na e scol.

Mientras tanto gobierno lo ta yudando e mayornan cu lo kier haci uzo di ‘online learning’ atraves di dos fundacion, uno na San Nicolas (SOAZA) y otro na Playa (Educampus Learning) unda cu lo por yega na un acuerdo di pago. Howell por a compronde for di e minister cu ya caba ta 200 studiante a registra na San Nicolas pa sigui e online learning aki.

Adicionalmente, pa brinda mas posibilidad pa nos mucha y hobennan por sigui haya e educacion cu nan tin derecho riba dje, ta implementando e curso di IPA pa maestronan por ta miho prepara pa duna educacion digital/virtual. Di e forma aki, mayornan por acerca cabesante y maestro di scol pa e mucha(nan) por haya e les via whatsapp, e-mail of cualkier otro medio digital.

Alan Howell ta indica cu e desaroyonan aki ta hopi positivo pa mucha, hoben y mayornan unda ta keda demostra un biaha mas cu enseñansa y bienestar di un y tur ta keda central.

Lo mester keda vigila e desaroyonan den e simannan nos dilanti pa asina por realisa un evaluacion di e decisionnan aki, pero ya caba por mira cu dos di e partinan mas importante a haya tur e atencion necesario, esta salud di nos muchanan y nan enseñansa. Finalisando Alan Howell a bisa cu e ta desea tur studiante un aña escolar nobo hopi exitoso. “Ban pe, boso por!”