Kico e preferencia sexual pa pia di hende ta eigenlijk y con preocupante esaki (por) ta? Preferencia sexual pa pia di hende ta conoci tambe como ‘foot fetish’.
Un ‘fetish’ ta un preferencia, y tin bes hasta obsesion sexual pa un obheto of parti di curpa, di cual e presencia fisico of den imaginacion ta psicologicamente necesario pa excitacion of gratificacion sexual.
Den caso di un foot fetish, excitacion sexual sin cu e pia ta den wega, sea fisicamente of den forma di fantasia, ta dificil y tin bes hasta imposibel.
Tin diferente grado di fetish sexual:
Opcional
E fetish ta forma parti di e persona su repertorio sexual. Pues, e ta un di e factornan den e repertorio sexual cu lo provoca excitacion sexual.
Preferi:
Pa e persona excita sexualmente, ta preferibel pa e fetish ta envolvi. Den e caso aki, incorporando e fetish den e repertorio, bo por ta mas sigur cu e excitacion sexual lo tuma luga.
Exclusivo
E persona no por haya excitacion sexual si e obheto cu e ta desea no wordo incorpora mediante fantasia of den realidad. Pues e fetish mester ta parti di e repertorio.
Investigacion haci door di expertonan di e universidad Italiano di Bologna a determina, cu e fetish di mas comun ta inclui parti di e curpa humano. Di esunnan cu a duna di conoce di tin un afinidad special pa partinan corporal, 47% a bisa di tin preferencia pa pia y dede di pia.
Tur tipo di fetish ta cay bou di e categoria clinico yama ‘paraphilia’. Paraphilia generalmente ta wordo defini como gusto of deseo sexual cu ta desvia di e normanan. E Manual di Diagnostico Estadistico (DSM) ta clasifica paraphilia como un desorden psychosexual, den e caso aki yama ‘podophilia’.
Ki ora tin motibo pa preocupa?
Un foot fetish ta un motibo di preocupacion ora cu e pia ey ta e unico enfoke di gratificacion sexual. Pues un podophilia cu ta cay bou di e categoria exclusivo ta preocupante, mirando e hecho cu e persona no por comparti otro forma di expresion di amor. Den e caso di un foot fetish cu ta absolutamente necesario pa por yega na excitacion sexual, e enfoke lo ta completamente ariba e pia, haciendo practicamente imposibel pa e persona relaciona su mes romanticamente cu un otro persona.
E obsesion aki por haci tambe cu e persona lo bay mira categorianan pornografico di foot fetish frecuentemente, y na unda un pia ta presente, lo por hasta bay over na masturba publicamente, mishi of expone su mes na otro persona sin su consentimento. Esaki lo ta encera un combinacion di mas cu un paraphilia, cual ta haci e situacion mas complica.
Asina cu un fetish ta activo pa mas cu 6 luna, ta domina bo bida, ta causa preocupacion, angustia of tristeza, of ta forma un peliger pa bo of pa otronan, ta ora pa busca ayudo psicologico. Den e caso aki tin hopi chance cu bo lo wordo diagnostica cu un paraphilic disorder, un desorden mental cu ta rekeri ayudo profesional.
Si esaki no ta e caso, bo por tin un preferencia kisas no usual, pero cu no ta forma un peliger, ni lo haci ningun hende daño, tanten cu e wordo practica entre adulto y cu consentimento. Un solo manera tin, pa haci bo fantasia realidad. Habri e combersacion, papia cu bo pareha tocante bo deseo y mira con boso por incorpora bo foot fetish den boso repertorio sexual. Ken sa, bo lo por descubri cu bo pareha ta un ‘foot hedonist’, un persona cu ta disfruta ora su pianan wordo consenti, admira y adora, y si no ta asina mes, por lo menos e lo por ta open pa disfruta di un relaxing foot massage.
Desiree Swaen, Intima-C Coach
Julisa Arends-Hoevertsz, Intima-C Consultant
https://www.facebook.com/intimacskillsacademy/