ORANJESTAD, Aruba –12 augustus 2020: Gradualmente e casonan ta subi, gradualmente ta bay ta ahusta y trese cambio na cierto maneho.
Pa loke ta e maneho di esnan den cuarentena DVG ta informa lo siguiente.
Tur persona cu ta biba den un cas cu un persona positivo pa covid-19 ta bay automaticamente den cuarentena. E pareha di e persona positivo cu no ta biba na mes un adres tambe ta bay den cuarentena. Tur ta bay den cuarentena obligatorio pa 7 dia, sigui pa 7 dia recomenda. E dianan obligatorio (7) ta wordo cubri pa SVB.
Si dentro di e prome 7 dianan presenta sintoma mester ta tuma contacto cu dokter di cas pa test. Si despues di 7 dia no presenta sintoma e persona por bay traha cu tur medida di proteccion, pero DVG ta recomenda tuma 7 dia di vakantie y sigui monitor bo salud na cas y na prome indicacion di sintoma mester consulta cu dokter di cas.
Cu otro palabra, si bo ta biba den un cas cu un persona positivo, no warda te ora cu DVG yamabo. Pa medio di esaki bo ta informa cu bo mester bay den cuarentena obligatorio 7 dia.
E personanan cu ta biba cu un caso positivo, DVG ta señalanan y ta informa SVB di nan.
Familiares, amistades cu no ta biba den e cas pero cu a papia of encontra cu e persona positivo NO ta bay den cuarentena pero mester monitor nan salud pa sintoma, sigui tur instruccion di proteccion y si nan desaroya sintoma yama dokter di cas.