Home Local “Nos no kier keda Aruba nos kier bay bek cerca nos famia”:...

“Nos no kier keda Aruba nos kier bay bek cerca nos famia”: Venezolanonan deteni a subi dak di GNC cu bandera di nan Pais den man y cantando nan himno

SHARE
Sabana Berde – Dialuna mainta den careda di 10’or tur esnan pasando altura di Kazerne di Brandweer na Sabana Berde por a mira algun homber para ariba dak na Guarda Nos Costa.

No tawata trata di mantencion di e dak, pero di un protesta mas di parti Venezolanonan deteni den Guarda Nos Costa.

E biaha aki nan tawata cu bandera di nan pais y algun laken mas cu cos skirbi aribanan. Tambe a canta Himno di nan Pais Gloria al Bravo Pueblo.

Na varios ocasion nan tawata pidi y vocifera cu nan kier bay di Aruba y no ta desea di keda cera mas.

Tambe a menciona over e trato cu nan lo ta hayando, cu segunnan no ta esun miho.

E personanan aki a bisa claramente cu nan no ta desea di keda ariba e Isla mas pero cu nan kier bay, y cu no por sigui tenenan preso manera animal.

Esaki tawata palabranan di un di esnan cu tawata ariba dak.

Nan a haci un apelacion na Minister President y Minister BIkker(di Husticia) pa haci algo, o sea pa regla algo cu un persona por para garantie pa nan y si cu si nan mester pasa firma 2x pa dia nan lo haci’e, pero no asina aki.

Prensa a wordo permiti pa drenta paden(tereno di GNC) y asina scucha nan banda di medaya.

Un cabayero bou e nomber di Jose a para dilanti y a papia pa e grupo.

E la splica cu e la yega Aruba como turista y a keda traha, tambe cu nan a gare den un avenida.

Cos a tranca cu Sr.Milko Baiz

Nan a sinta tres biaha cu Sr. Milko Baiz cu ta man drechi di Minister Bikker y nan splica Baiz nan preocupacion y nan proposicionnan.

Segun Jose(e Venezolano) tur cos tawata bayendo bon.

Di cuatro biaha cu mester a reuni cu Sr.Milko Baiz parse cu e lo a lanta cu e pia robes di cama. Ey ta unda cu cos a tranca, y aki Sr.Milko Baiz a skop mesa(lo a rabia) y bisanan cu e ta bay cu vakantie tambe.

Di nan parti, nan a bise cu e actitud ey nan lo no tin nada mas di papia cu ne.

Segun Jose durante e reunion Baiz lo a bisanan cu e tawata Polis, Abogado y awor Politico, kiko Baiz kier a bisanan cu esey no ta mucho duidelijk.

Segun e vocero nan a mustra nan durante e reunionnan cu nan tin tur cos cla pa por yega Venezuela bek, esta e coördinaat, nomber di e lancha y matricula. Tambe cu nan tur lo firma cu ta ariba nan mes un responsabilidad.

Tur informacionnan aki segun e vocero Sr. Baiz representante di e Ministerio di Husticia lo tin.

Pero cu asina mes nada ta wordo haci. E la sigui bisa tambe cu ta esnan cu “nan” kier ta haya un persona para garantie pa asina e por ta den libertad.

E la sigui bisa tambe a base di kiko lo sigui tenenan eyden, 1 of 2 aña mas ?

Nan deseo ta bay di Aruba y cu nan lo firma cu nan mes ta responsabel pa esaki.

Human Rights y Rode Kruis

A bisa cu na varios ocasion a pidi pa Human Rights y/of Rode Kruis bishitanan pero esaki te cu awor lo no a sosode.

Jose a sigui bisa cu nan lo ta wordo maltrata, humiya, y nan no mag di haya bishita y cu ta 5 minuut so nan mag di sali(for di cel) ariba dialuna, diaranson, y diabierna.

Manera nos a bin ta splica ya na varios ocasion, cu frontera di Venezuela ta cera y no tin ningun fecha ki dia esaki lo habri bek of si e lo habri bek un dia tanten cu Presidente Maduro ta na poder.

Segun Minister di Husticia nan lo a haci varios intento ariba tereno diplomatico, pero esey lo no a duna resultado. Segun Jose (e Venezolano) Trinidad & Tobaco lo a pone un grupo di Venezolano ariba boto(pues via Maritimo) pa asina nan por a yega Venezuela bek.

E opcionnan ta mustra di ta cabando(of ya lo a caba), y no ta asina cu por saca tur hende y laganan haci e intercambio ariba lama grandi. Esaki ta sumamente riscante y algo iresponsabel cu Gobierno di Aruba kizas lo no bay den un aventura asina.

Lamentablemente mester bisa si cu pa awor e situacion pa e personanan aki lo no cambia.  Gobierno tin e tarea “fastioso” cu mester dialoga ariba nivel di Reino y keda purba wak si asina ey lo por logra algo.