Mester constata cu definitivamente gobernacion di Aruba ta stagna. Un ex-minister cu ta ser investiga pa corupcion y abuso di poder, ainda ta dirigiendo e gobierno. Esaki claramente a sali diabierna ultimo for di e reunion di Parlamento, unda a trata e retiro di minister Marisol Lopez -Tromp. Nos por a mira un reunion yen di “kakafonie” na comienso cu menaza y tambe expresionnan menos agradabel den direccion di mesun miembronan di partido y coalicion, loke sigur no lo contribui pa un relacion di trabou placentero pa algun tempo.
Hopi ta esnan cu a keda desepciona despues di e “schorsing di 10 minuut” cu a dura un eternidad, pa despues bin un schorsing “tot nader orde”. E expectativa pa e di dos tanda tabata halto. Pueblo kier a haya sa mas, pero coalicion diripente a cambia di opinion y enbes di retiro a haci un peticion pa mas intermediacion. Diasabra Minister di Husticia tur abati, ta bin bisa cu awor si e tin pasenshi pa sigui lapi y lijm y tambe cu e no tabata tin chens di defende su mes den Parlamento. Tambe nos por a scucha di e lider actual di e partido POR cu ela lamenta e critica cu minister Lopez-Tromp na un manera no-etico a ataca su propio coleganan minister. Pero unda e ministernan aki tabata ta? Segun nos constitucion, den capitulo III articulo 18 ministernan ta liber pa atende y participa na reunionnan publico di Parlamento,cu of sin cu nan a wordo invita!
E tragi-comedia aki, cu sigur a bin ta pone cara di nos pais Aruba na berguensa mirando e rol mediocre di nos Parlamentarionan, tabata tin un “MIRON” cu sigur a goza di e situacion aki. EstavHulanda. Enbes di enfoca na atende cu e demandanan Hulandes, nos politiconan na Oranjestad ta haya gana pa cuminsa cu polemica politico partidista cu ta haci nos situacion mas debil ainda. UPP riba 20 di april a bolbe propone na gobierno di Aruba pa yama un Dialogo Nacional y sugeri pa bini cu gabinete nacional pa atende e problemanan cu a presenta cu Hulanda. Riba 24 di juli ultimo UPP a manda pa Parlamento un peticion pa institui un Dialogo Nacional pa asina nos yega na un Consenso Nacional con nos ta sali for di e cadena di crisisnan cu nos ta aden. Na e momento ey parce cu e atencion tabata dirigi con pa bula un minister su cabez, meramente pa interesnan personal y partidista. E actuacion aki sigur ta debilita mas nos posicion pa cu gobierno Hulandes. Nos ta demostrando un inmadurez total pa nos por resolve nos problemanan y salbaguardia nos autonomia y defende nos derecho di autodeterminacion.
Drentando luna di augustus cu lo por ta un luna determinante pa cu nos autonomia y sosten prespuestario di gobierno Hulandes, e acontesimento- y desaroyonan politico di e ultimo simannan cu su culminacion diabierna ultimo, ta pone nos di UPP sinti cu nos lo bay conoce un otro “Augustus Scur” na Aruba. Y compara cu e “Augustus Scur” di 43 aña pasa, cu den nos historia politico ta wordo relata como un hecho positivo cu a contribui na realisacion di nos Status Aparte, e “Augustus Scur” di 2020 lo bay tin su conotacion negativo, ya cu e por hiba na hustamente na perdemento di nos autonomia, memey di un instabilidad politico y destructivo, dota di un polarisacion enorme y politisa. Nos prioridadnan na e momentonan aki parce di ta robez. Si nos no baha for di e cabay partidista y kita nos brilnan di nos colornan politico y pone e bril di e bandera di pais Aruba, nos lo haya nos ta doblega pa Hulanda den e luna aki.
P’esey UPP ta bolbe haci un yamada, pa tur e partidonan cu representacion di Parlamento, nos gobierno actual, pa recapacita y pensa cu pa e aña cu ta resta pa eleccion, bin cu un gabinete Nacional den forma di un zaken/takenkabinet/crisiskabinet cu ta carga sosten di tur partido den Parlamento. Un periodo di eleccion awor, manera ex-lider di MEP ta propone, no ta combini Aruba na e momentonan aki. E cambio di idea pa e dos partidonan aki bay traha cu otro sigur ta uno bon bini, pero UPP ta kere cu e dos partidonan aki mester mustra e intento aki awor, memey di e crisis actual. Si nan cera cabez cu otro por bin un gabinete di expertonan cu lo tin di traha riba un lista di tareanan specifico di e.o. mara mannan di e politiconan, pa asina percura pa crea un ambiente nobo na momento cu eleccion di 2021 presenta. “United we stand, devided we fall and perish”!
Partido UPP
Booshi Wever
2 di augustus 2020