Diabierna Prome Minister Evelyn Wever-Croes a ricibi un carta di Lider di Partido POR y e dos Parlamentarionan di POR informando cu nan ta retira nan confiansa den e Minister di POR, sra. Marisol Lopez-Tromp.
Conseho di Minister a tuma e decision di kita e carteranan di sra. Marisol Lopez-Tromp y encarge cu un tarea specifico di mehoracion di proceso y reactivacion economico (fast track), mientras a activa un delegacion pa intermedia, di acuerdo cu e Programa di Gobernacion “Hunto Pa Aruba”.
Mientras tanto e carteranan di sra. Marisol Lopez-Tromp lo bay resorta bou di Prome Minister Evelyn Wever-Croes inmediatamente.
“Mi ta garantisa cu tur e investigacionnan y restructuracionnan lo continua.
Aruba ta den e peor crisis den historia di nos pais. Ta di lamenta cu e problemanan interno di Partido POR no por a wordo soluciona internamente, pero esaki no mag stroba e maneho di nos pais. Nos prioridad awor ta y lo sigui ta, atende cu entre otro COVID-crisis, reactiva nos economia y pone nos pais bek riba pia”, Prome Minister a duna di conoce.