Home International E ola di mortonan inexplicable cu a conduci na e film “A...

E ola di mortonan inexplicable cu a conduci na e film “A Nightmare on Elm Street”

SHARE

Desde aña 1977 te cu final di decada ‘80 dokternan na Estados Unidos a haya nan mes confronta cu un serie di casonan hopi peculiar, caminda un cantidad di 117 refugiado di e tribu di Hmong, procedente di Laos, sureste di Asia, a muri den nan soño sin ningun splicacion concreto. Tur e hombernan aki tawata jong – cu un edad averahe di 33 aña – y tawata bon di salud.

Expertonan den ramo di medicina a conclui cu e causa mas probable tawata e asina yama “Sudden Nocturnal Death Syndrome”, cu ta bai man den man cu un tipo di pesadia den cual e persona literalmente ta hanja un spanto mortal cu ta ocasiona un paro cardiaco. Durante e episodio e persona ta paraliza completamente, y no ta reacciona ariba ningun intento pa pone bin bij.

Antropologa Shelly Adler, autor di e buki “Sleep Paralysis” ta conclui cu e morto di e personanan aki por a wordo causa door di nan creencia den e asina yama ‘Dab Tsog’, un demoño cu ta bishita nan durante anochi y cu ta press ariba nan pecho, strobando nan di hala rosea. Aunke cu dokternan mas bien tawata mira den direccion di un posibel condicion cardiaco prevalente den hombernan Asiatico, Adler a conclui cu e trauma sufri pa e hombernan aki, den nan encuentro cu e demoño aki, durante nan estado di sonjo profundo, lo por a hunga un rol grandi.

Un di e hombernan a describi su encuentro cu e Dab Tsog na Adler: “Un sombra scur tawata biniendo den mi direccion. Ela yega na e pia di mi cama y a sigui bin ariba mi. Mi a sinti un peso ariba henter mi curpa. Mi pecho a manera congela, mi tawata sinti cu mi ta hogando.”
Adler a studia e fenomeno di Sleep Paralysis, describi como un episodio caminda e persona ta sinti cu e ta lanta, pero e no por move ni papia. Esaki ta sosode na momento cu tin un disturbio den e transicion pa e Rapid Eye Movement (REM) sleep. Na e momento ey e persona por experiencia halucinacion den cual e ta tende y mira cosnan. Adler a nota cu den diferente cultura e episodio di sleep paralysis ta bai man den man cu un of otro presencia maligno of en todo caso algo espantoso cu den cierto casonan – manera den caso di e hombernan di e tribu di Hmong – por asta causa morto.

E pelicula “A Nightmare on Elm Street” y su figura principal, Freddy Krueger, ta basa ariba e storia di e encuentro mortal di e hombernan aki cu e ‘Dab Tsog’.
Abo a yega di experiencia algo asina? Comparti bo storia.