Tabata den un encuentro diaranzon mainta na Te Aworo cu e mandatario a ofrece un mainta di gratitud specialmente na HYATT, unda cu a entrega na e GM un plakaat di gratitud pa nan contribucion na e causanan social di bureau di Minister di Asunto Social y Labor.
Te Aworo ta un crèche cu a ser funda na aña 1962 pa e soeurnan di Bethania. Desde e tempo aya, Te Aworo ta existi y ta lider di ehempel con un centro di cuido di mucha mester funciona. Como esun di mas grandi di San Nicolaas, Te Aworo tin capacidad pa 150 mucha. Pero gastonan di operacion a aumenta den transcurso di añanan cu tur su consecuencianan. Pero danki na e iniciativa di Minister Glenbert Croes, kende tin su historia personal cu Te Aworo, den cooperacion cu sector priva, diferente ta e companianan cu ya a duna nan contribucion na Te Aworo. Aña pasa tabata Renaissance Hotel kende a renoba un parti di e edificio cu ainda te e mesun original di 1962. Awe a toca e mandatario expresa su gratitud na e General Manager di HYATT, Sr. Gabriel Castrillon pa su contribucion. Sesenta empleado a demostra nan cooperacion y disponibilidad pa haci trabou di mantencion y limpiesa na e tereno di Te Aworo pa siguridad di e muchanan cu ta di 2 luna te cu 4 aña di edad.
Sra. Sheirla Cilië, directora di Te Aworo, primeramente a expresa su gratitud na Sr. Rochi Geerman y Sra. Darlaine Erasmus, kendenan a establece e prome contacto cu Te Aworo. Di aki a nace diferente proyecto bunita di cooperacion entre Bureau di Minister y Sector Priva cu metanan social pa nos comunidad.
Na final di e mainta, Minister Glenbert Croes a duna su palabra di danki na Sr. Gabriel Castrillon, na e ekipo completo di HYATT como tambe na Sra. Cilië pa e curason social di oro cu tur tin. Fraccion di MEP semper ta presente y dunando su apoyo incondicional na e metanan social di Gabinete Wever- Croes, demostrando asina e compromiso cu ta existi pa trece mehoransa y desaroyo social, poniendo nos muchanan, nos hendenan central. Danki na e mocion di Fraccion di MEP cu Te Aworo lo bira e proyecto piloto di un Crèche di Estado pa Aruba. Cu un resultado exitoso di e prome proyecto piloto aki, e meta ta pa den tur bario aki na Aruba tin un Staatscrèche, apoyando asina mama/mayor cu ta traha pa hiba su famia dilanti.
