Excelencia,
Pa medio di esaki partido Union Patriotico Progresista (UPP) ta confirma di a recibi e carta fecha awe 6 di juli 2020 cu e topico di Cumbre Lidernan Politico. Den dicho carta señora minister ta expone e motibo di e invitacion, esta e intencion di gobierno Hulandes pa bini cu un Rijkswet cu ta regla un entidad financiero cu lo bay ta encarga pa brinda Aruba e ayudo necesario despues cu e pandemia actual di COVID-19 tabata tin su impacto riba finanzas di Aruba. Al igual e intencion pa Aruba tambe bay forma parti di e Rijkswet di supervision financiero RFT.
Pa basta tempo caba partido UPP a bin ta urgi gobierno pa yama un Dialogo Nacional na unda tur gremionan por ta presente pa discuti e problemanan cu nos Aruba ta enfrenta debi na e exigencianan Hulandes. Durante e pandemia, riba dia 20 di april 2020, nos a manda un carta (y documento) cu ta splica nos preocupacion y cu e sugerencia pa gobierno organisa un Dialogo Nacional cu e intencion pa yega na un Compromiso Nacional pa contra-aresta e intencionnan Hulandes. Lastimamente nos no a haya un reaccion di banda di gobierno riba nos sugerencia.
UPP ta acepta e invitacion y lo ta presente, apesar di tin nos reservanan. Motibo di nos reservanan tin di haber na prome lugar cu e formato cu minister-presidente ta usa pa e cumbre politico. Na nos parecer e formato no ta encera un dialogo real. Un intercambio di idea entre tur e gremionan cu e intencion pa yega na un contesta nacional di e sentimiento di e pueblo Arubano pa cu e condicionan Hulandes. Un sentimiento cu lo por conta riba un sosten mayoritario den nos comunidad. UPP tin mas bien e pensamento cu aki ta trata di un encuentro cu lidernan pa pulsa opinionnan.
Nos a yega na e conclusion aki despues di a scucha Minister Presidente trece dilanti den medionan di comunicacion cu e intencion di e cumbre ta pa duna informacion y tende kico cada partido y/of gremio ta pensa di e situacion pa despues atende e topico aki cu Parlamento di Aruba. UPP a comprende cu despues di e rondanan aki riba 8 y 9 di juli proximo, gobierno di Aruba lo duna un contesta na gobierno di Reino cu lo reuni diabierna awor.
Nos no ta kere cu esaki lo ta e forma mas responsabel pa atende cu e situacion serio cu ta presenta pa nos pais. Es mas si e informacion cu lo tin un documento di 218 pagina conteniendo 18 condicion extra cu Aruba lo mester cumpli cu n’e ta corecto, anto partido UPP ta puntra su mes si ta prudente pa den apenas 2 ora di reunion y den apenas 2 dia di “consulta” ta consehabel pa tuma un decision responsabel cu tin un embergadura masha importante pa e futuro autonomia di nos pais Aruba.
Como tal nos kier expresa, cu presencia di partido UPP na dicho encuentro, no ta nifica cu partido UPP lo ta di acuerdo cu e contesta cu gobierno di Aruba ta bay duna na gobierno Hulandes. Pa nos por tin un opinion mas concreto, pa partido UPP lo ta necesario, pa banda di tempo, tin tambe e documentonan y condicionnan cu gobierno di Aruba lo a ricibi di gobierno Hulandes.
Partido UPP su opinion ta bon cla, esta cu nos mes mester bin cu e reformanan necesario, no pasobra esakinan a wordo imponi pa Hulanda, pero pasobra cu nos tin e urgencia pa establece un gobernacion cu ta wordo rigi pa reglanan y leynan estricto aki na Aruba. Pero nos actonan mes ta hiba nos cu ta gobierno di Hulanda ta imponiendo kico lo tin di sosode na e momentonan aki.
Adhunto nos ta mandando tambe atrobe nos carta di 20 di april 2020 y tambe nos nota di 2015, unda cu UPP a delinea su puntonan di bista. Alabes nos kier a informa minister cu nos a avisa partido PPA, mirando cu den e ultimo eleccion e dos partidonan aki a combina lista, pero cada partido ta riba nan mes.
Atentamente,
Candelario A.S.D. Wever Lider Union Patriotico Progresista – UPP Cel. 593-2287 [email protected] [email protected]
