Oranjestad, Tradicionalmente na luna di juli, Aruba Bank ta organisa su Good for the Neighborhood (G4N) pa muchanan di scol pa duna bek na comunidad. Debi na e situacion di e ultimo lunanan, empleadonan a bin hunto pa duna bek na comunidad durante di un clean-up day organisa den e area di KIA na San Nicolas y asina contribui na alivia e problema di sushedad na Aruba.
Un grupo di empleado y nan famia a reuni trempan diasabra mainta pa cuminsa piki sushi den e area. Mester bisa cu a keda sorprendi cu e cantidad di boter di glas y desperdicio, especialmente cahanan y container di plastic di restaurantnan fastfood, cu nan a piki. Den total empleadonan y nan famia a acumula dos (2) truck di sushi cu a wordo transporta pa dump.
Na final di e dia tur a disfruta di un dushi paki di fruta y boter di awa. Aruba Bank kier gradici Vanessa Rasmussen di AHATA pa yuda indica e areanan cu mester atencion, Turtugaruba pa duna nos tips, y Total Cleaning pa yuda cu transporte.
Si cada cuidadano contribui na mantene areanan rond di nan cas y/of negoshi limpi, y mantene nan mes na e Plastic Ban Ordinance cu a pasa dia 1 di juli, 2020, Aruba lo yega leu den su meta pa combati sushedad na Aruba.
