Gobierno Hulandes no ta sconde mas su desconfiansa den e forma di gobernacion di e Islanan Hulandes den Caribe y abiertamente a expresa cu e islanan no por carga nan autonomia. Den Tweede Kamer diferente parlamentario a indica cu, si kier ricibi ayudo Hulandes, e islanan mester responsabilisa debidamente e maneho di finansas publico. Cu mester atende tambe cu casonan di corupcion. Remarcabel ta cu a menciona publicamente Serlimar como ehempel na Aruba. Por ultimo a señala cu awor si no lo tolera ningun tipo di retraso y manipulacion den un ehecucion debido di e condicionnan estricto mara na e ayudo financiero y a indica cu e ayudo Hulandes mester bay pa e necesidad di e pueblo y no pa esnan cerca di gobierno,cu otro palabra NO na Friends & Family!!
P’esey a tuma e decision pa no duna e ayudo financiero directamente na e gobierno di Aruba, pero lo bay institui un entidad independiente pa maneha e placa. Y Aruba a guli e condicion aki sin mas manda bou, cu otro palabra “zonder tegensputteren”!
Den baseball cu tres strike bo ta out y den futbol ora bo a haya e di dos caarchi geel, e cora ta sigui sin pordon y bo lo mester bandona tereno. Den politica local di Aruba tres strike of dos caarchi geel no tin ningun consecuencia. Bo ta hasta wordo premia pa un conducta coruptivo.
Asina e gobierno anterior AVPOR a haci un peticion na Parlamento y e Parlamento a bay di acuerdo pa un minister cu tabata wordo investiga pa e gewoon keda ricibi su salario manera nada a pasa.
E gobierno actual POREDmep no kier a keda atras y a sostene un cambio di ley di Serlimar pa mas ayudo financiero, mientras no tabata tin ningun tipo di responsabilisacion di un maneho desastroso y obviamente coruptivo. Y pa colmo e ex-mandatario responsabel a haya un posicion lucrativo den RDA entre otro.
Tur raport di CAft a mustra cu e maneho financiero, sea presenta den e presupuestonan of sea den e responsabilisacion cada 4 luna, no tabata duna un bista corecto, cu tabata uza cifra incorecto, of tabata usa entradanan incidental pa tapa buraco.
E ultimo eleccion a conduci na un gobierno di coalicion entre partnernan cu anteriormente no por a soporta otro. Na prome bista esaki a parce manera un politica nobo, un politica mas madura na unda interes general lo mester a prevalece. E parlamentarionan nobo a hasta haci un promesa di lo evita di ta un “Stempelparlement” y tin tur intencion di inicia un etapa nobo den nos democracia y awor si lo vigila e gobierno debidamente y exigi responsabilisacion di e maneho. Nan a usa e palabra Parlamento “NOBO”. Historia lo mustra sinembargo cu hustamente e parlamento nobo aki lo ta esun cu mas a wordo humiya door di Hulanda y pa colmo tambe door di nan propio gobierno POREDmep. Bou di e gobernacion actual cu ta wordo conforma door di e partido cu su fundador y lider maximo Betico Croes dfm a hiba un lucha tenaz pa cumpli cu e anhelo di su pueblo pa un Status Aparte, un estado autonomo den e Reino hulandes, lo drenta historia como e partido entreguista cu: NO A COY E BANDERA PERO CU A CAY NA RUDIA”!
E intregantenan di e partido geel lo argumenta cu e situacion actual a wordo hereda di e gobierno anterior y pa colmo a empeora door di e corona virus, pero ta lubida cu a core campaña indicando cu nan SI tin e solucion pa e mega debe como tambe haci un cantidad di promesanan populista! Haciendo esaki ta bisto cu nunca nan tabata tin e minimo intencion di en berdad goberna drechi.
Si e intencion tabata pa goberna drechi anto for di un comienso lo mester a introduci reglanan estricto di Bon Gobernacion. For di un comienso lo mester a rechasa cualkier tipo di corupcion y for di un comienso lo mester tabata honesto cu nos pueblo cu e maneho lo bay nifica sacrificio sin ningun excepcion. P’esey mester yega na e conclucion cu e gobierno actual mester wordo mira como e “MALBADO”, mescos cu e gobierno anterior y pa e motibo aki ta responsabel pa e metemento Hulandes.
Ta pesey ban UNI pa nos coi e bandera y lanta para firme, marando e mannan di e politiconan dor di introduccion di reglanan estricto di Good Governance. Asina nos lo mustra mundo henter cu nos ta merecedor di ta autonomo y cu nos por carga esaki, paso NOS kier esaki y no paso Hulanda kier! Y nos lo sa di carga esaki TAMBE!
“TA E PUEBLO SO POR SALBA E PUEBLO”!