Oranjestad (AAN); Despues di entrega “labtop” na e studiantenan di Colegio San Nicolas, a sigui e siguiente proyecto di Kiwanis Club of Aruba, cu ta prepara y parti paketenan di cuminda. E proyecto ta pa duna sosten y ayudo na e famianan y e comunidad di Aruba, cu ta pasando den momentonan dificil consecuencia di e pandemia COVID-19. Durante e tempo aki di crisis sin precedente cu Aruba y mundo ta enfrentando, e miembronan di Kiwanis Club of Aruba ta trahando duro riba diferente proyecto. E idea tras di Kiwanis Club of Aruba su proyecto di cuminda a surgi door cu e club ta conta cu 45 miembro y cada miembro ta adopta asina un famia. E famia lo ricibi paketenan yena di cuminda. Kiwanis Club of Aruba ta trahando cu diferente instancia pa asina haya e informacion di e personanan cu mester di un ayudo. E proyecto tin un duracion di 3 luna cuminsando e luna aki di mei y asina continua den e lunanan di juni y juli. Tur luna Kiwanis Club of Aruba lo yuda 45 diferente famia. En total lo yuda 135 famia y alrededor di AWG 25,000. 00 na cuminda.
Diahuebs for di oranan tempran di mainta e miembronan di Kiwanis Club of Aruba a bin hunto pa asina prepara e paketenan di cuminda. Un total di 180 pakete di cuminda a wordo prepara y cada famia a ricibi 4 pakete. Den e paketenan a inclui entre otro productonan di prome necesidad, comestible, productonan di higiena y productonan di baby.
Diasabra e prome 45 paketenan di cuminda a wordo distribui na e famianan den e barionan di San Nicolas, Santa Cruz, Oranjestad y Noord. Kiwanis Club of Aruba lo continua cu e proyecto di cuminda den lunanan di juni y juli. Cu e proyecto aki Kiwanis Club of Aruba ta spera di por a brinda un sosten y yuda alivia e famianan cu ta pasando den e momentonan dificil.
Kiwanis Club of Aruba kier a gradici tur e miembronan pa nan tempo, ayudo y cooperacion a realisa e proyecto.
Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1964. Pa mas informacion di Kiwanis Club of Aruba y of su actividadnan por acudi na www.kiwansclubofaruba.org of Facebook page Kiwanis Club of Aruba.
