Hopi parti di mundo mondkapje ta mandatorio. Paisnan manera Venezuela, Colombia, Estados Unidos, Cuba, Alemania, Honduras, Francia y hopi mas a haci’e mandatorio pa personanan bisti mondkapje momento cu nan ta den publico. Como cu coronavirus ta contagioso hasta den persona cu no ta mustrando sintoma, paisnan ta pone enfasis pa tur hende bisti mondkapje y asina preveni transmission. Den e imagen ful abou por mira mas tocante e probabilidad transmission.
Un estudio cientifico conduci pa Middlesex University a descubri cu hombernan, mas cu muher, tin berguesa di bisti mondkapje. Esaki ta resultado di un encuesta di 2459 persona bibando na Estados Unidos. E co-lider di e estudio, Dr. Valerio Capraro, a duna di conoce cu nan investigacion “…a revela cu homber tin mas chens di expresa emocionan negativo y stigma momento di bisti mask cu ta cubri cara.”
E participantenan di e estudio a wordo puntra riba nan intencionan pa bisti mondkapje pafor di hogar, durante actividadnan social y ora ta den contacto cu persona di un otro hogar. E resultadonan a saca afor cu homber tawata tin menos chens di scohe pa bisti mask pafor di cas, compara cu hende muher.
Muhernan a wordo haya mas probabel di bisti mondkapje durante actividadnan esencial. E investigacion a determina cu hombernan ta nenga di bisti mondkapje paso e no ta ‘atractivo’. Hombernan mas liher a bay di acuerdo cu declaracionan manera ‘bistiendo mondkapje ta un berguensa’ y “bistiendo mondkapje ta un indicacion di debilidad”.
Por bisa cu e mensahenan cu sociedad ta propaga, ta pone hende homber sinti cu nan no mag mustra debil o tin berguensa di mustra debilidad. Esaki ta pone cu hombernan por tuma decisionan cu kizas ta riesga nan salud den un manera of otro. Pa ta cauteloso y siguiendo medidanan di seguridad contra cualkier enfermedad contagioso, ta responsabilidad di tur adulto.
