A base di peticion, diamars atardi a tuma luga dos reunion cu diferente persona cu ta representa e gruponan di ATV/ UTV. Den e reunionnan a atende cu preocupacion di e gruponan cual ta: Kico e proteccion di 16 areanan di naturalesa lo significa pa operadornan di vehiculonan ATV/UTV.
Minister di Desaroyo Teritorial, Infrastructura y Medio Ambiente Marisol Lopez – Tromp a duna e grupo splicacion di e decreto cu ta indica e areanan cu ta proteha pa naturalesa y e importancia pa por ta consciente di dje. Pero tambe pa por respeta e decreto aki. Un otro punto cu a enfoca riba dje den e reunion ta riba e parti di seguridad di e vehiculonan y keuring cu mester tuma luga na DTI. Ta importante pa menciona cu representanten di e gruponan di ATV/UTV a percura pa trece nan puntonan di bista dilanti den e reunion.
Ademas, durante di e reunion Minister Lopez – Tromp a recorda e grupo di representantenan di companianan di ATV/ UTV cu Aruba tin un Plan di Desaroyo Teritorial (ROP) cu ya desde 2009 ta fiha cua ta e areanan destina pa naturalesa.
Ministerio di Desaroyo Teritorial, Infrastructura y Medio Ambiente ta hiba un maneho enfocando riba desaroyo sostenibel. Pues ta sali for di e punto di bista cu cualkier actividad mester por tuma luga den forma cu esaki no ta perhudica nos areanan natural protegi conforme maneho di ROP / ROPV.
E reunion aki a tuma luga conhuntamente cu Minister Lopez – Tromp como Minister di Desaroyo Teritorial, Infrastructura y Medio Ambiente, Minister encarga cu Husticia Andin Bikker y Minister encarga cu Transporte Chris Romero.
