Maracastraat – Diabierna durante henter dia Aruba tawata experenciando un biento hopi fuerte, cu rafaganan rato rato basta duro.
Den oranan di atardi un dak den Maracastraat na Taraban a ranca completamente.
Polis diabierna atardi algo pasa di 5’or a bay Maracastraat na Tarabana, unda cu dos dak a wordo ranca.
E daknan aki ta parti di un afdak dilanti di un cas.
Polisnan na nan yegada no por a kere kiko nan tawata mira. Un parti di e dak a bay cay patras di e cas, cu tur e consecuencianan cu esaki por tawata tin cune. Danki Dios ningun persona tawata unda e la cay.
E otro part a lanta y keda benta ariba e cas.
Brandweer a yega na e sitio y aki bomberonan a haya e tarea dificil pa baha e dak cu a lanta bay cay ariba e cas. Pues nan mester a subi ariba e dak pa yuda bahe pa e no bula bay causa daño.
Prome cu esey a pidi pa ELMAR debi cu tawata tin wayanan di coriente tambe visibel cu a ranca ora e dak e bay.
A dura bomberonan basta rato pa lanta loke a bula bay y trata na drecha loke tawata por.
Elmar a tarda un poco, pero na final nan tambe a yega pa controla y/of kita cierto parti pa Bomberonan por a termina nan trabou.
E parti fastioso awor ta pa e habitantenan cu tin un gasto halto pa drecha loke a wordo lanta door di e biento fuerte.
