Otro maniobra di presion riba pueblo
Den pleno crisis grandi, den e presion grandi cu pueblo ta pasando aden, Gobierno na luga di percura pa alivio, gabinete Wever Croes ta haya cu ta necesario pa pone mas presion riba lomoba di pueblo.
Parlamenario Benny Sevinger di fraccion di AVP ta mustra cu e forma di procede di gobierno ta un abuso directo conra un pueblo cu ya ta pasando den un situacion hopi serio, luchando contra un enemigo grandi manera covid-19.
“E cos aki ta un abuso di gobernantenan contra un pueblo cu ta den pleno lucha contra un virus y cu ta cuidando nan salud, ta bay pone extra carga riba pueblo pa regla nan asunto di huurgrond.
Den e pleno lucha cu pueblo henter ta hibando, e minister encarga ta pone cu tur hende cu tin un huurgrond tin cu bay yena un formulario dunando informacion relaciona cu nan huurgrond, locual ta imposibel na e momentonan aki pa cumpli cu esaki.
Sinembargo esaki no ta nada straño con e gobierno aki ta traha un mucho menos e minister nobo kende a caba di sinta, ya cu den pasado e minister anterior aki a yega di bisa cu 15 mil peticion pa tereno pa traha cas pero cu tur hende mester bolbe bay inscribi di nobo.
Esunnan cu no a re-inscribi e minister a saca nan nomber for di computer y e hendenan aki no ta bin na remarke pa haya un tereno mas y asina el a saca miles di hende for di e bestand di DIP.
Despues e mes ta bin bisa den Parlamento cu el a yuda e hendenan aki ya cu e grupo grandi a baha te na algun mil solamente pero cantidad di hende semper tabatin nan documento di peticion den man y semper a confirma cu nan a haci tur peticion manera cu mester ta.
Awor cu e minister nobo a sinta algun luna atras, e mesun situacion aki ta presenta pa colmo den pleno crisis grandi cu pueblo ta pasando aden cu e corona virus.
Pues e departamento di DIP ta ceran pa duna servicio na publico pero minister ta bin dilanti y bisa cu tur hende cu kier un huurgrond nobo, tin cu bay inscribi pero na mes momento ta bisa cu tur hende cu tin un huurgrond na e momentonan aki caba, mester bay re-inscribi atrobe.
A avisa tur hende pa bay riba e website di DIP pero ora cu bay riba e sistema ey, por lesa caminda e minister ta bisa cu tur tereno cu hendenan tabatin den huur, cual a caduca of ta bay caduca, ya cu tur tereno di huur tin un periodo di cinco aña mara na dje.
Awor gobierno pa medio di e minister ta exigi un re-inscripcion obligatorio pa tur hende pa haci esaki pero cu nan tin un luna di tempo pa cumpli cu esaki pero loke ta mas serio di esaki ta cu ta obliga e hendenan pa bin re-inscribi den luna cu gobierno di e minister aki, tin e pais den un ‘lockdown.’
Den mesun lucha cu gobierno di e minister aki tambe a introduci un ‘shelter in place’ pues ningun hende por bay saca un copia of scan nan permiso y ta manda tur hende bay riba website pa re-inscribi.
Esunnan cu no haci esaki den e luna stipula cu ta termina den luna di Mei, gobierno ta yega na e conclusion cu e hende no ta interesa mas den e tereno di huur y lo kita esaki for di dje.
Esaki ta loke nos tin cu yama simplemente un gobierno abusado di haci uso di e oportunidad cu pueblo a luchando contra e corona virus, pa aki un luna e minister concerni sali bisa cu e tin tanto tereno liber awor pa asina e por bay duna su compinchinan cu ta wardando tereno di huur.
Ta inaceptabel e forma con un gobernante y un gobierno ta actua den pleno crisis unda pueblo ta su mente y atencion ta na e momentonan aki riba su salud, salud di su famia, con nan tin cu bay atende cu nan debenan fin di luna, con ta bay sobrebibo den proximo lunanan, anto ta bira pone un stress adicional riba hendenan cu tin un huurgrond,” Parlamentario BennySevinger a declara.