Pos Chikito: Un rato pasa un auto a perde control y a bolter riba Green Corridor na altura di rotonde Pos Chikito.
Mesora a manda Polis, ambulance y materiaalwagen di Brandweer na e sitio. Na yegada polis a bin topa cu e auto gebolter, dos persona tabata den e auto y un a logra sali prome. Un miembro di Rode Kruis a presenta na e sitio pa duna un man, mientras tabata wardando riba yegada di ambulance y materiaalwagen.
Mientras cu tabata wardando riba yegada di ambulance, e personal di brandweer a logra saca e otro persona cu tabata pega den e auto sin cu mester a corta e auto. E miembro di Rode Kruis cu tabata na e sitio a atende e otro victima tambe, te ora cu ambulance a yega pa tum’e over.
E auto, un Toyota Mark X, color blanco cu dos hoben den dje, mirando cu e ora di Toque de queda tabata acercando, nan lo tabata pura pa yega cas y velocidad halto lo a pone cu nan a perde control, dal den un cero di santo y bolter.
