For di ongeveer un luna pasa nos muchanan y hobenan ta na cas den cuadro di e crisis di Covid-19. Tur easki ta pa nan propio siguridad y siguridad di Aruba completo. No ta un secreto cu pa hopi mucha y hoben na Aruba, juist scol ta e sitio di pas den nan bida. Muchanan cu lastimamente no por a haya pas, siguridad, amor y atencion na cas, tawata haya esaki na scol.
Manera ya caba menciona den un relato anterior, ta juist durante crisisnan cu negligencia y abuso di mucha por presenta mas. Esaki ta e motibo pakiko Fundacion Telefon pa Hubentud Aruba a keda brinda nos muchanan y hobenan di Aruba den e momentonan aki tambe ayudo via telefon, email y chat. Juist awor mester tin mas atencion pa nos muchanan y hobenan.
‘Mirando cu mayan tin Shelter in Place y mi no tin internet na cas, kiko mi lo por haci?’, ‘Mi ta fada di tur e discusionan cu mi mama’ y ‘E stem ta bisami tur dia pa hacie, pero mi ta bai den mi happy place y ta haya trankilidad bek’ ta algun di e yamadanan cu Telefon pa Hubentud ta ricibiendo durante e dianan aki. Salud mental, ansha, depresion, ferfela, combersa, informacion di un instancia y situacion na cas ta e temanan pakiko nos muchanan y hobenan actualmente ta tumando contacto cu Telefon pa Hubentud.
Telefon pa Hubentud Aruba kier a pidi tur mayor pa tuma e dianan aki pa combersa mas hopi cu ta posibel cu e yiunan. Y tambe nos kier a pidi e yiunan pa confia na mayornan y durf di combersa cu nan.
Telefon pa Hubentud kier a recorda tur mucha y hoben cu nos tey tur dia di 2:00 te cu 6:00 di atardi pa scuchanan. E servicio di Telefon pa Hubentud ta gratis, anonimo y confidencial. Banda di yama nos tur dia por chat cu nos via di e 131app. 131app ta gratis y por download e via App Store of Google Play.