Nivelnan halto di polucion di aire ta aumenta e riesgo cu un persona lo fayece di COVID-19, esaki segun dos estudio haci. Dr. Maria Neira di World Health Organization (WHO) a splica cu paisnan cu nivelnan halto di polucion mester prepara pa esaki.
E paisnan di Latino America, Africa y Asia lo ta mas afecta. Esnan cu a desaroya condicionan medico preexistente pa motibo di polucion ta haya sintomanan mas pisa di COVID-19. Aunke cu tin otro expertonan medico ta haya poco prematuro pa prueba un relacion directo entre mortalidad di COVID-19 cu polucion di aire.
Dr. Neira (WHO), a informa cu nan lo ta trahando un mapa di e cuidadnan cu tin mas polucion. Esaki lo wordo traha abase di un database cu WHO tin pa asina duna sosten na autoridadnan nacional di e regionan aki pa yuda nan prepara adecuadamente.
Un estudio Estadounidense a sugeri cu mortalidad di COVID-19 ta subi cu 15%. Esaki hasta den areanan unda cu a mira solamente un aumento chikito di particula di polucion di aire den e añas prome cu e pandemia. E particulanan aki , cu por ta 1/30 parti di diameter di un pida cabey humano, tin un relacion cu problemanan di salud cual ta inclui infectionan respiratorio y cancer di pulmon.
Segun cu un autor di e reportahe, profesor Francesa Dominici, ta conta cu conclusion di e investigacion haci ta duna un prueba caba di e prome sospecho cu hopi tawata tin. E teoria prome cu e investigacion a wordo haci ta cu e severidad di infeccion di COVID-19 ta wordo aumenta pa polucion di aire. E investigacion ta duna posibel splicacion tambe pa e cifranan halto di morto na norte di Italia.
Den e partinan norte di Italia, cu ta e region di Lombardia y Emilia Romagna, a mira un porcentahe di fayecemento pa COVID-19 na 12%, compara cu e resto di Italia cual tawata 4,5%. WHO a duna di conoce cu polucion di aire ta mata 7 miyon persona cada aña. Mas cu 90% di e populacion global ta biba den areanan unda e polucion di aire ta pasa e limitenan internacional, esaki ta mastanto e caso pa paisnan pober.
Profesor Srinath Reddy, Presidente di India su fundacion di salud publico ta enfatisa cu si polucion di aire a daña caba e sistema respiratorio di un persona, no ta keda mucho forsa pa e lucha contra un atake respiratorio manera di coronavirus.
