Home Uncategorized Estadonan Mericano ta considera industria di cannabis como uno esencial durante crisis

Estadonan Mericano ta considera industria di cannabis como uno esencial durante crisis

SHARE

33 Estado Mericano ta permiti benta y consumo di cannabis. Di e 33 estadonan, 20 a asigna e industria di cannabis como esencial durante e crisis di coronavirus. Activistanan y proponentenan Mericano di legalisacion di cannabis ta aplaudi e progresonan legal cu a wordo logra. Pero tambe nan ta di opinion cu tin hopi descrepancia entre e estadonan Mericano.

24 estado (cual ta inclui Florida, Connecticut, Pennsylvania y New Mexico) ta permiti pa persona cumpra marijuana. Nan por pasa ‘pick -up’ nan pedido pafor di e establecimento. Otro estado, manera Nevada, a sera e tiendanan y solamente delivery di cannabis ta posibel. Ohia, Delaware y Minnesota ta permiti pashentnan pa consulta cu nan dokter via un sistema digital pa asina ricibi nan receta pa marijuana medicinal.

Debbie Churgai di ‘Americans for Safe Access’, a splica cu cada estado Mericano a mustra di ta anda diferente cu e industria di cannabis, esaki a indica un falta di guia federal adecua. E diferencia den maneho durante e crisis aki no ta sali na beneficio di e consumidor.

Un veterano di mariniers Mericano, Sean Carnell di Massachusetts, ta sufri di dolornan cronico pa motibo di un lesion celebral y otro cirugianan cu e mester a ricibi pa motibo di lesionan sosteni durante su trabou. Prome cu Massachusetts a bai bou shelter in place (stay at home order), e a haye ta cumpra mas cu 1000$ na productonan di cannabis pa asina e sigura cu e tin suficiente durante e lockdown. Carnell di 40 aña, a splica cu e a bay cumpra flornan, juice y otro mangelnan pa asina e por tin pa e siguiente simanan su dilanti.

Karen O’Keefe di Marijuana Policy Project a splica cu “den hopi estado, cannabis a bay di ilegal pa esencial den un tempo corto”. E industria tin hopi dificultad si pa opera, esaki hasta bou condicionan normal. E industria di cannabis ta wordo cobra tarifanan halto di belasting y tin dificultad pa haya fiansa na banconan. Tambe, paso e ta un substancia cu ta ilegal bou ley federal, nan industria lo no haya ayudo for di e 2 triyon dollar di fondo di ‘coronavirus relief’ cu Presidente Trump a firma. E desafionan aki ta haci cu e negoshi legitimo di cannabis ta bira vulnerabel pa e black market.

O’Keefe a splica cu den e contexto di e crisis, e tin preocupacion. E a splica cu e riesgo ta halto paso personanan bendiendo marijuana ilegalmente lo no ta sigui e rekesitonan di distanciamento social, higiena y otro medidanan di proteccion contra e virus. Pesey su organisacion ta boga pa mas expansion legitimo durante e crisis.

E pandemia a subraya e importancia cu cannabis tin den e sociedad Mericano. John Kagia miembro di New Frontier Data ta monitor e benta y consumo di e industria di cannabis. E a duna di conoce cu tin 43 miyon Americano cu ta consumi cannabis regularmente y ta gasta un total di 70 biyon dollar pa aña den ambos mercado legal y ilegal di cannabis.

Proponentenan di legalisacion di cannabis tawata di pensamento cu pa fin di aña un 40 estado lo tin leynan di legalisacion cannabis riba nan agenda. Mirando e crisis di COVID-19, no ta sigur con hopi di un prioridad estadonan mas afecta pa e virus lo haya esaki.