Career IQ ta presenta “Restart Conversations – Virtual Summit”. Ta trata di un conferencia gratis online cu lo consisti di tres parti y ta tuma luga riba tres diferente diasabra den luna di mei. E tres partinan di e serienan online ta: 1. economia y entrepeneurship, 2. turismo y 3. innovacion y responsibilidad civico.
Diferente orador lo comparti nan conocemento riba e temanan aki y hunto cu esaki lo tin e panelistanan invita, unda lo trata e preguntanan di e participantenan di e virtual summit. E meta principal di e conferencia virtual aki ta pa crea oportunidad pa haci e discusionan den e areanan aki y ta y teniendo cuenta cu e situacion cu mundo y Aruba ta pasando aden, esta cu e Covid-19. Career IQ kier stimula combersacion entre tur e participantenan pa pensa con pa por “restart” Aruba durante y despues di e crisis mundial aki.
E discusionnan aki lo ta retorico cu e mensahenan positivo, pa asina inspira e participantenan pa participa y tuma accion den nan seno y sigui crea un “ripple effect” di optimismo den nos comunidad pa rehabilita nos isla.
E summit por trece balor agrega pa un participante mediante e conocemento cu e lo haya den e tres partinan menciona y alabes e por descubri ki oportunidad tin. E responsabilidad civico di tur Arubiano ta pa rehabilita nos isla y participando na e conferencia aki bo por forma un parti activo den esaki y haci e preguntanan na profesional di Aruba y wak nan perspectiva riba e temanan aki. Un otro parti ta cu lo trata e ideanan creativo y innovativo di e “15 idea challenge” cu Career IQ a haci den nan “book club” como parti di e “book club initiative” di escritor internacional Simon Sinek cu su buki “Start with WHY?”.
Career IQ Aruba ta un show na radio, unda cu tur siman ta brinda varios conseho practico y eficiente enfocando riba e lidernan local den nos comunidad tocante con cada un di nos por desaroya nos propio carera, alcansa nos metanan y logra disfruta e bida cu nos tur ta desea. Tambe e programa tin un seccion asina yama “Surviving 8-5” unda ta ofrece e tipnan practico riba diferente area laboral. A lansa e show na 2019 y awe e ta den su di 4 temporada cu mas di 40 entrevista cu diferente lider local.
Pa bo por participa of pa haya mas informacion di e conferencia virtual aki bo tin cu simplemente subi e pagina di “social media” di Career IQ Aruba riba Facebook of Instagram. E summit aki lo tuma lugar riba diasabra 2, 9, 16 di mei di 10 or pa 11 or y mey di mainta. Tuma nota cu e cuponan ta limita.
Registra y asina forma parti di e combersacion pa “restart” Aruba, nos dushi isla.
