Sero Pita – Diabierna anochi pa mas o menos 7:50 informacion a drenta cu auto a dal un persona ariba bicicleta na Sero Pita.
Mesora patruyanan cerca a cuminsa bay e sitio, cu ta poco pabou di e crusada di Sero Pita.
Na yegada polisnan a mira e bicicleta y un dama ariba caminda benta. E dama tawata ariba caminda net dilanti di un Suzuki Swift cu lo ta esun cu a dal e.
Un impacto bastante fuerte, y esaki por a wordo mira na e windshield parti drechi di e auto. Por a mira cu e dak parti ariba tambe a dobla.
Segun informacion na e sitio, e dama ariba bicicleta lo a subi dilanti e auto.
Ariba e bicicleta no por a mira ningun luz.
Ambulance a ser pidi cu urgencia, mirando e impacto duro y con e vehiculo a keda.
Na yegada di Ambulance e Paramediconan mesora a baha y cuminsa atende cu e victima.
Den algun minuut cu ayudo di polis e la wordo lanta y hinka den ambulance, unda cu despues di a stabilise a sali cune direccion Hospital.
Polis di trafico a presenta na e sitio y a pidi presencia di BFTO cu ta e departamento tecnico di polis.
