Home Politics Dellanire Maduro, lider di Fraccion di POR A presenta mocion den Parlamento...

Dellanire Maduro, lider di Fraccion di POR A presenta mocion den Parlamento pa salvaguardia nos flora, fauna y salud na Aruba

SHARE

Lider di Fraccion di POR, Dellanire Maduro durante reunion publico siman pasa pa atende e topico di Citgo a enfoca su mes riba medio ambiente.

El a enfatisa e importancia pa Aruba tin un ley di medio ambiente (mileuverordening) pa salvaguardia nos flora y fauna, pero tambe salud di nos comunidad, y den e caso specifico di un refineria, specialmente comunidad di San Nicolas.
Maduro a splica cu ta conoci cu e gasnan cu un refineria por produci ta toxico, dañino pa medio ambiente, flora, fauna y salud. Pa locual a trata e ser bibo, algun especie ta mas sensitivo y e toxicidad por varia atraves di nan ciclo di bida. Algun efecto por ta letal of por tin efecto sub-letal den crecemento y reproduccion.

Tambe por causa daño permanente manera problemanan respiratorio, iritacion di cuero, nausea, problema cu bista, dolor di cabes, defecto di nacemento, leukemia y otro tiponan di cancer.
“Bisando esaki ta hopi importante pa tene cuenta kico nos comunidad lo kier mira wordo desaroya na e tereno aki. Ta importante pa involucra nos comunidad ora di tuma e decision di e direccion cu nos lo bay, involucra nos yiunan di tera, hobennan, involucra nos hobennan emprendedor, involucra nos hobennan profesional. Na final ta nan ta bay carga esaki hunto cu nos futuro generacion di Pais Aruba. Nos mester bin cu oportunidad y posibilidadnan realistico pa Pais Aruba!” Dellanire Maduro a bisa.

El a agrega cu e por a scucha minister Marisol Lopez Tromp menciona diferente posibilidad cu e tereno (di e refineria) por wordo destina pe segun e ley di ROPV, por ehempel: negoshinan enfoca riba proceso, warda, distribucion di combustibel fosil (tankinan), empresa/companianan relaciona cu puerto, energia alternativo por ehempel zonnepanelen y ferry. E diferente posibilidadnan di desaroyo aki por resulta den empleo pa hopi di nos hendenan, cual na e momentonan aki den cual mundo henter ta pasando den un crisis, ta hopi importante.
Pa cu esaki Fraccion di POR a presenta e siguiente mocion:

Considerando: Cu e echo cu gobierno ta yegando na un acuerdo di terminacion cu CITGO; Cu a base di e acuerdo cu Citgo y e terminacion cu Valero, Gabinete Mike Eman II, a exonera no solamente CITGO di daño na medio ambiente pre-existente, sino tambe Valero, El Paso, Coastal di e.o. un ‘environmental claim’; Cu operadornan den pasado a causa daño enorme na nos medio ambiente; Cu e momento a yega pa adopta y implementa metodo sostenibel y stimula avance economico pa nos pais teniendo nos medio ambiente na cuenta; Cu pa logra esaki mester tin instrumentonan legal pa eherce control y impone sancion. Ta dicidi: Pa urgi gobierno pa finalisa e diseño di e ley di medio ambiente (milieuverordening) y pa presenta esaki mas pronto cu ta posibel na Parlamento di Aruba. Esaki como prome paso pa logra e meta di un Aruba medio ambientalmente ekipa pa futuro.

Dellanire a expresa cu a bira ora pa di berdad nos cuminsa pensa kico nos kier pa nos futuro y nos bunita isla Aruba. E realidad ta cu desde cu e virus aki a cuminsa infecta hende y nos economia rond mundo, e la pone tur hende para keto un rato y reflexiona riba kico ta importante di berdad. “Mi deseo ta cu nos lo por sigui bay dilanti cu un plan cu lo por yuda nos economia, pero na mes momento ta tene cuenta cu nos medio ambiente, flora, fauna y salud. Mi ta sigur cu e generacion di awendia y esun di futuro lo duna nos tur danki ora cu nan wak cu nos a tene nan na cuenta ora di pensa riba desaroyo di nos economia. E generacionnan di awe y esun cu ta bin ta mas conciente cu nunca riba loke ta e aspecto di medio ambiente, y e ta keda na cada un di nos pa haci nos maximo esfuerso pa no laganan na caya”.