Home Politics DECISION PA DIANAN DI FIESTA: Establecimento na Aruba mester cera

DECISION PA DIANAN DI FIESTA: Establecimento na Aruba mester cera

SHARE

Minister President Evelyn Wever-Croes a anuncia e decision cu a wordo tuma pa e crisisteam pa cu dianan di fiesta benidero. Pa loke ta trata diabierna (Bierna Santo), diadomingo (Pasco Grandi) y dialuna (Segundo dia di Pasco Grandi), tur establecimento na Aruba lo ta cera cu excepcion di botica, dokter, stacion di gasoline y restaurant pa take away, drive thru y delivery.

Mirando cu e dianan di fiesta ta wordo considera como dianan di riesgo, Minister President ta pidi comunidad di Aruba pa keda paden. “No tin motibo pa bay lama, hunga domino of sali bishita hende. Na lama e samenscholing verbod lo ta aplicabel y no tin excepcion pa famia”.

Diasabra mainta 6 am e situacion lo ta bek manera e tawata, dus Shelter in Place lo ta bek na vigor.

Gobierno di Aruba ta haciendo su maximo esfuerso pa por controla e virus aki p’e no sigui plama y te cu awe ainda tin e situacion controla y p’esey ta hopi importante pa tur ciudadano ta consciente y responsabel y cada un duna di su banda pa cu e situacion aki por mehora.