Oranjestad 1 april 2020. Banco di Seguro Social, SVb ta desplega un tarea importante den e sistema di seguridad social na Aruba. Tur luna SVb ta percura pa un parti di nos comunidad ricibi un entrada mediante pago di Pensioen di Biehes.
Algemene Ouderdomsverzekering, AOV cu ta Pensioen di Biehes ta un seguro social pa cubri e consecuencianan financiero di biehes.
Cada aña e edad di pensioen ta subi cu 6 luna y esaki lo sigui te cu 1 januari 2024 ora e edad di pensioen lo yega na 65 aña. Actualmente e edad di Pensioen ta na 63.
Un ciudadano tin derecho riba su pensioen entrante e luna despues di e fecha riba cual el a yega e edad di pensioen. Personanan cu ta bin na remarca pa aplica pa Pensioen di Biehes entre 1-4-2020 y 30-4-2020 a ricibi un carta di SVb cu e informacion necesario pa haci esaki. Tur persona cu a nace entre 1 di juli y 31 di juli di 1957 ta bin na remarca pa aplica pa nan Pensioen y lo cobra esaki riba 1 di augustus 2020.
Aplica pa Pensioen di Biehes ta facil y por haci esaki riba nos plataforma digital MiPensioen. Pa aplica, subi nos website www.svbaruba.org y scoge e opcion MiPensioen, sigui instruccion y entrega bo peticion hunto cu e documentonan rekeri via nos portal. Documentonan cu ta rekeri pa aplica pa pensioen ta cedula (paspoort / rijbewijs) y comprobante di cuenta di banco.
Peticion haci via internet ta mas facil, sigur y lihe. Riba nos website tin un video di instruccion cu ta duna e guia con pa haci peticion di Pensioen di Biehes/AOV via di nos portal.
Nos portal di MiPensioen tambe ta brinda mas servicio pa e asegurado. Riba nos portal di MiPensioen por print loonopgaaf y inkomensverklaring. Tambe tin e formulario di “Herzienning mutatie” cu ta permiti e asegurado haci cambionan personal manera entre otro cambio di adres, banco y mas.
Banco di Seguro Social su Departamento di Pensioen ta haci tur esfuerso pa sigui brinda e miho servicio na e comunidad di Aruba y lo duna servicio durante e dianana aki den forma digital pa segura e beneficionan cu ta necesario pa nos comunidad.
Si tin cualkier pregunta over di e aplicacion online por manda un email van [email protected].