Oranjestad: For di comienso di e crisis aki, desde cu e Corona Virus a haci su entrada na Aruba, algun persona a haya ta bon pa traha diferente voicenote, cu un meta pa crea panico innecesario den pueblo.
Un gran mayoria di e voicenotenan aki (pa no bisa tur), ta basa ariba mentira, ariba invento di hendenan cu no lo tin nada di haci y ta sinti nan bon pa traha voicenote manda rond pa crea panico den pueblo.
Tur informacion confiabel y confirma ta bin for di canalnan oficial cu ta DVG y Gobierno di Aruba. Locual ta bin anonimo ta basa riba mentiranan y riba jokenan laf.
No sigui manda e voicenotenan aki rond, paso bo ta yudando crea mas panico innecesario, cu consecuencia di filanan largo dilanti algun supermercado, hendenan para den fila, den solo, wardando nan beurt pa drenta haci compras, cu e temor cu tur negoshi lo cera y nan lo keda sin cuminda.
Tambe mandando e voicenotenan aki, ta un forma di trata na descredita e canalnan oficial y pa bruha tera.
Varios persona ta puntra si por persigui e personanan aki legalmente, segun nos a compronde for di un abogado cu esaki lo trece hopi dificultad cune y cu ta casi imposibel pa stop esakinan via caminda judicial.
Nos isla y henter mundo ta pasando den momentonan hopi dificil y sigur esaki no ta e momento pa manda fake voicenote y crea panico innecesario.
Djis sigui e canalnan oficial cu ta bisando, cu actualmente tin 19 caso y cu tur ta stabiel. Y sigui e instrucionnan cu DVG y Gobierno ta manda pa publicacion.