Tumando na cuenta e impacto cu e confirmacion di e casonan di COVID-19 na Aruba tin riba economia di nos pais, a dicidi di introduci un pakete di flexibilisacion pa un period di 3 luna, cuminsando entrante 1 di april 2020, pa asina brinda tanto e dunador di trabou como e trahador, e sosten necesario pa surpasa e periodo critico aki.
Punto di salida di Gobierno di Aruba ta keda cu e consecuencia di e crisis aki ta bai wordo carga door di un y tur, sin excepcion, y ta un responsabilidad colectivo, cu otro palabra, TUR partido, sin excepcion, mester duna su maximo pa enfrenta e crisis aki.
Gobierno di Aruba, entre otro, ta duna posibilidad na e dunador di trabou y trahado pa aplica pa un compensacion for di e Fondo di Asistencia Social di Emergencia (FASE) pa cubri entrada di trahadornan cu como consecuencia di reduccion di oranan di trabou ta bai ricibi menos di Awg. 950,00 pa luna.
Pa un dunador di trabou por haci uso di e diferente medidanan cu Gobierno di Aruba a introduci recientemente, incluyendo e posibilidad di aplica pa e Fondo di Asistencia Social di Emergencia (FASE) pa su trahadornan, mester tene na cuenta cu e dunador di trabou primeramente tin un responsabilidad social di duna maximo siguridad na su trahadornan.
Pa por aplica pa FASE como tambe haci uso di e pakete di medida Gobierno di Aruba, pa medio di e diferente instancianan, lo bin cu e siguiente condicionnan pa e dunador di trabou:
A. E dunador di trabou ta paga e empleado su salario pa luna di maart 2020;
B. E dunador di trabou mester presenta un plan di accion concreto con e ta pensa di atende cu e
consecuencia financiero cu a wordo causa door di COVID-19, tumando na cuenta e interes di su
empleadonan;
C. E dunador di trabou, segun su forza financiero, mester demostra di por aplica flexibilisacion di
orario di trabou parcial prome cu aplica reduccion di ora completo;
D. Den caso cu no cumpli cu e puntonan antes menciona no lo bin na remarca pa e compensacion a base di FASE y e trahador lo mantene e derecho di reclama pago di su salario for di e dunador di trabou.
Tumando na cuenta cu a cumpli cu tur e condicionnan stipula ariba, e pakete di flexibilisacion ta consisti di lo siguiente.
Ley Laboral:
• Flexibilidad di oranan di trabou a base di necesidad individual demostra door di e empresa;
E trahador ta mantene e derecho pa ricibi pago pa e ora cu e traha – esaki di mutuo acuerdo entre e dunador di trabou y e trahador; Ta urgi e dunadornan di trabou pa mantene contractonan laboral vigente; Ta recomenda pa duna trahadornan vakantie cu pago prome cu aplica pa flexibilidad di orario di trabou, esaki manteniendo un ‘buffer’ di 5 dia di vakantie pa e trahador; Sin cumpli cu tur e condicionnan ariba menciona, y si no por demostra e necesidad (financiero) pa termina contratonan laboral, peticionnan pa ontslagvergunningen cu ta wordo entrega na
Directie Arbeid en Onderzoek no lo wordo honra;
• Temporada di e pakete: di 1 april 2020 te cu 30 di juni 2020.
Nota: Fecha pa entrega ultimo aplicacion (pa bin na remarca pa e asistencia social den luna di juni 2020 ainda) lo ta 1 juni 2020.