Marawiel – Diasabra marduga polis a bay ariba e caminda di Marawiel cu ta sigui pa Kuriburi, pa un persona drumi banda di caminda.
Na yegada di polis for di leu nan por a mira algo blanco. Yegando mas cerca nan a nota cu ta un persona lora den un laken blanco y cu un cusinchi.
Hunto cune e tawata tin su tas.
Polisnan mesora a reconoce, ta un hoben biba na Paradera y cu segun polis e ta sordo mudo.
Polisnan a splike un ke otro y cu e no por drumi banda di caminda door cu e ta peligroso.
Elo a compronde y a lanta coy su klechi y cuminsa cana bay direccion pariba.
Por a mira tambe cu e hoben no tawata tin sapato bisti tampoco. Segun nos a compronde, mas trempan polis a haye drumi na Ayo Rock Formation y nan mester a bise pa e move tambe.
Loke ta pasando segun nos por a compronde ta cu e hoben aki lo tin un of otro problema cu un di su mayornan. Esaki a pone cu e hoben lo a rabia y bay for di cas. Lamentablemente si nan a haye durante e Toque de Queda elo wordo deteni y lo por core e risico di haya un boet di 10mil florin.
Posiblemente e lo por ta sufri tambe di un problema emocional cu sigur elo mester haya debido ayudo pe. Ban spera cu e informacion aki por yega na e instancianan concerni pa asina yega na un solucion.
