Recientemente un grupo di taxista a expresa nan malcontento pa cu un decision di Douane relaciona cu importacion di vehiculo destina pa servicio di Taxi. Ta asina cu segun interpretacion di Douane pa loke ta e ley di ‘Personenvervoer’, nan tabata di opinion cu por tin un ‘personenauto’ cu un capacidad di te cu 6 asiento, incluyendo e chauffeur. Y pa cual motibo autonan te cu e capacidad aki so por a ricibi dispensacion di pago di impuesto di importacion.
Den opinion di un grupo di taxista e decision tuma pa Douane tabata uno cu ta bay contra e beneficio di nan trabou, y pa cu esaki nan ta pidiendo intervencion di e Titular di e Cartera di Transporte, esta Minister Chris Romero.
Minister Romero di su banda a tuma tur ponencia, tanto di Douane y taxistanan, na consideracion y asina a sondea tur posibilidad pa yega na un solucion satisfactorio pa tur partido envolvi.
Despues di un analisis profundo y sintando na mesa cu diferente partido directamente involucra, Minister Romero a logra yega na palabracionnan concreto cu ta percura pa Douane sigui duna dispensacion di pago di impuesto di importacion, riba vehiculonan pa transporte di persona, te cu un capacidad di 9 asiento (incluyendo e chauffeur). Mester remarca cu cantidad di pasahero ta keda 5 pa awor, dunando espacio pa pasaheronan menor di 2 aña. E decision aki a keda ratifica tambe unanimamente den Conseho di Minister.
Di e manera aki Minister Romero ta cumpli cu e necesidadnan di nos taxistanan, kendenan ta un grupo importante cu ta aporta grandemente na nos turismo, cual ta nos pilar economico principal na Aruba.