Na final di aña pasa Parlamento durante dos reunion a haya tur cifra presenta door di Departamento di Finanzas, cual proyeccion a mustra cu Gabinete Wever-Croes lo cumpli cu normanan financiero stipula. Den e reportahe di responsabilisacion, emiti e luna aki, por wak cu e resultado di e maneho financiero cu a wordo hiba ta mas positivo ainda. A gasta menos recurso, a logra norma financiero y norma di personal manera palabra.
PRESUPUESTO SUPLETORIO 2019
Durante presupuesto supletorio 2019, CAFT y “Raad van Advies”, tambe a splica cu Gobierno ta cumpli cu e norma financiero. E “najaarsnota 2019” a splica den detayes (1) e desaroyo economico, (2) desaroyo di turismo, y (3) realisacion di entrada di Gobierno . “Raad van Advies” a conclui riba pagina 6 di nan conseho (RvA 157-19), bou capitulo 3, cu Gobierno lo cumpli cu e norma financiero manera palabra. E colegio di supervision (CAFT), a conclui cu gobierno ta cumpli cu e norma financiero palabra. Literalmente nan ta bisa riba pagina 3 di nan conseho (CFT 201900163) cu e Presupuesto Supletorio ta “saldoneutraal” y pesey nan ta conclui cu lo cumpli cu e norma financiero.
GABINETE WEVER-CROES, RAAD VAN ADVIES Y CAFT TA HAYA RAZON
Tur tres, Gabinete Wever-Croes, “Raad van Advies” y CAFT na final di 2019 a bisa cu lo logra e normanan financiero. Awo cu e cifranan di realisacion ta conoci por lesa den e reportahe cu a te hasta surpasa e normanan palabra. Na aña 2019 Aruba a conoce un surplus di 11.3 miyon florin. Pa loke ta e gastonan di personal tambe ta wak aworaki cu esakinan ta menos cu loke a wordo presupuesta na 2019. Esaki ta resultado di un maneho serio y responsabel.
DI DEFICIT PA SURPLUS DEN 2 AÑA
Na 2014 pais Aruba, bou liderazgo di Mike Eman, tawata conoce un deficit di 444 miyon florin. Esaki ta e mes momento cu liderazgo di Mike Eman a conduci cu Aruba a haya un Koninklijk Besluit (KB) pa mal gobernacion. Na 2017 pais Aruba tawata conoce ainda un deficit di 130 miyon florin, herencia di AVP. Liderazgo di sra.mr. Evelyn Wever-Croes y sra.mr. Xiomara Maduro ta transforma e deficitnan astronmico aki den un surplus despues di solamente 2 aña di gobernacion.