E programa Hulandes produci pa NPO 1 ‘Ellie op Patrouille’ awe lo estrena su episodio filma na Aruba. Den e tercer temporada di e programa ‘Ellie op Patrouille’ a filma 6 episodio, di cual 1 a wordo filma riba nos isla Aruba.
E meta di e programa ta pa asisti agentenan policial den nan trabou pa combati crimen. E programa ta wordo dirigi pa Ellie Lust, un ex-agente policial Hulandes di e cuidad di Amsterdam.
Den e tercer temporada di su programa e a bishita diferente otro paisnan manera Armenia, Mexico y tambe Filipina. E di tres temporada di su programa a cuminsa e luna aki.
Por mira su episidio filma riba Aruba awe ora local ta 04:30 pm riba NPO1 (ora Hulandes lo ta 09:30pm).
Den e ‘sneak peek’ di e episodio por mira con Ellie a traha hunto cu Cuerpo Policial Aruba pa gara algun sospechoso, detencion di persona, Ellie su tour rond di Aruba y tambe momento cu e ta entrevista diferente persona. E programa lo toca tema tambe riba refugiadonan y e trabou pa sigura nos frontera.
Sigur un episodio hopi interesante pa nos localnan mira.
Di otro banda o sea e banda di Aruba, no tawata of tin mucho elogio pa e dama aki cu ta un ex-polis. Mirando cu Cuerpo Policial Aruba a y ta pasando den asina tanto turbulencia selecta, pa bin duna un programa Hulandes tur e privilegionan cu si un compania local acerca pa haci’e casi sigur lo ta un dikke nee.
Ey esnan na top lo saca mil y un ley cu pakiko lo no por haci’e. Pero awor polisnan local a keda asombra ora cu nan a yega trabou y ata un T.V Crew Hulandes ta bula den patruya cu nan. Ki dia a mira un T.V crew local den un patruya?
Prensa local mes ora di incidentenan den varios ocasion (no tur ora y depende kennan) ta wordo stroba di eherce nan trabou cu ta pa informa e pueblo di Aruba. Hopi biaha a trece esey na conocimento di Mando Policial, pero bo ta haya un labamento di man cu ami no e si etc etc etc. Un storia sin fin, unda cu prensa local si ta wordo belemmerd durante su trabou.
Lust ta un persona hopi critico y polisnan Arubano ta ansioso (den tension) pa sa con e ex polis aki cu ta un media sensatie presentatrice lo rate Cuerpo Policial di Aruba.
