Un estudio nobo realisa pa Nacionan Uni a confirma cu 1 den cada 3 Venezolano no ta haya suficiente alimentacion. Cu hopi esfuerso pa purba pone cuminda riba mesa, ainda famianan no ta logra yega e minimo di e rekesitonan nutritivo.
Un investigacion nacional basa riba datos adkeri for di 8375 enquesta ta revela un hecho alarmante. Un gran mayoria di Venezolano nan dieta ta consisti di boonchi y algun otro berdura so. Pa motibo di inflacion, salarionan no tin mucho balor y prijsnan di cuminda ta sumamente halto.
Un total di 9.3 miyon persona, pues casi un tercer parti di e populacion Venezolano ta pasando hamber. Ta di remarca cu e gobierno Venezolano ta esun cu a invita Nacionan Uni pa haci e estudio aki.
E estudio ta informa cu e inseguridad alimentario ta un preoccupacion di henter e pais, hasta den e cuidad mas rico 1 den 5 ta pasa hamber. E gobiero di Maduro no a duna ningun comentario o reaccion ainda riba locual ta e hechos cu e investigacion a descubri.
Tambe e estudio a descubri cu 74% di famianan Venezolano a bin cu cierto strategianan pa locual ta nan alimentacion. Nan a cambia di variedad y calidad di cumindanan cu nan ta come. 60% di hogarnan a baha e cantidad di cuminda cu nan ta come. 33% a indica cu nan ta acepta cuminda como un forma di pago pa trabounan cu nan haci pa otro. 20% di famianan a bende pertenencianan pa asina cubri necesidadnan basico.
E problema ta uno no di falta di cuminda riba mercado, sino e prijsnan halto di cuminda. 7 den 10 persona a indica cu ta facil pa haya cuminda den tiendanan pero ta dificil pa cumpra e cumindanan aki paso e prijsnan ta hopi halto.
E investigacion aki a tuma parti durante e lunanan di juli pa september 2019. Defensora di derecho humano Carolina Fernández, a bisa cu pa awor e situacion sigur lo a deteriora mas ainda.
