Home Local Inscripcion pa e estudio pa maestro di Enseñansa Primario na IPA ta...

Inscripcion pa e estudio pa maestro di Enseñansa Primario na IPA ta cera dia 14 di februari

SHARE

 

Bo kier aporta na e formacion di nos muchanan? Bo ta un persona cu por carga responsabilidad y traha independientemente of den ekipo? Bo ta curioso y creativo? Si e contestanan ta si,  e ora e estudio pa maestro di enseñansa primario cu IPA ta ofrece ta e estudio ideal p’abo. E estudio aki ta forma maestro cu ta cualifica pa duna les na mucha di kleuter y of scol basico. Un maestro cu ta funciona competentemente den klas, na scol y den un ambiente social.  

Si abo ta un studiante den examenklas/ graduado di HAVO, VWO y EPI (nivel 4), y esaki ta zona un oportunidad p’abo, pasa  na Studenten Services di IPA pa inscribi. E orarionan di Studenten Services ta entre 8:30 di mainta cu 13 or di merdia y entre 2or cu 4or di atardi. Pa por inscribi mester trece e papel di registro civil (papel di AWG 5) y paga un suma di AWG 75,- p’asina cubri e gastonan di inscripcion. Si bo a gradua caba, lo mester trece copia di bo diploma di sea havo, vwo of mbo nivel 4. Si bo ta den examenklas di havo, vwo of mbo nivel 4 ta importante pa bo inscribi di awo caba mirando cu inscripcion ta cera 14 di februari 2020. Despues di e fecha aki no por inscribi mas pa aña academico 2020-2021. Tene cuenta cu pa aña academico 2020 – 2021, e estudio pa maestro di enseñansa primario ta e unico estudio cu IPA lo ofrece.

Pa mas informacion por tuma contacto cu Studenten Services na 5243100 of por bishita nos pagina di facebook ‘Instituto Pedagogico Arubano’ of nos website www.ipaaruba.com