Skirbi pa Celia Thiel sociologa
Carnaval
Carnaval ta un fiesta internacional y ta wordo celebra den hopi paisnan segun nan custumber. Den principio, carnaval a wordo celebra den clubnan priva. Na Aruba esaki tambe tawata e caso. Prome cu añanan 1940 tawata celebra carnaval cu entre otro fiesta di disfras, y di mascarada. Despues a eligi reina, prins y ultimo pancho. E reina cu sali esun di teritorio di Corsou, ta bai entre otro Cuba pa e eleccion di reina di carnaval internacional. Den e gran mayoria di paisnan tawata toca musica folklore, y esaki tambe tawata e caso pa Aruba. Gruponan tawata toca tumba, danza, wals, caha di orgel. Esaki tawata e caso paso casi no tawatin comunicacion y e medio pa scucha cantica di otro paisnan. Na aña 1954 Aruba a haya su prome radio emisora y prome cu esey algun hende so tawatin fonograf y disco.
Carnaval di masa den Caribe Hulandes a cuminsa na 1964 na St. Eustatius (21km²), na Saba (13 km²) 1975, na St. Maarten (34 km²) den añanan 70, na Corsou (444 km²) 1971 y na Aruba (181km² 1954.
Na Aruba ya caba na 1953, Club Tivoli tawatin flota cu ta pasa den camindanan di Orjanjestad y na Santa Cruz a core tras di e reina cu ta den auto capa baha, den algun caminda. Tur esakinan ta forma di parada. Na 1954 carnaval di masa a bira oficial na Oranjestad. Tur hende por a participa den diferente grupo. Como 4 aña despues San Nicolas a conoce su prome parada. E echo cu pa celebra cabamento di di dos guera mundial cu un parada, no ta argumento pa bisa cu e prome parada a wordo teni na San Nicolas. E intencion di e parada ey, no tawata carnaval. Ta importante pa remarca cu Lago a bin Aruba y trahadonan a bin di afo Aruba pa traha. Aruba ya caba tawatin su tradicion, custumbernan y cultura. Den e face organizatorio, ya caba na Aruba tawatin clubnan priva cu su miembronan. Organizamento, tawata den crecemento na Aruba.
Paso ni St. Eustatius, Saba y ni St. Maarten tawatin carnaval prome cu Aruba, habitantenan di e islanan aki no por a trece carnaval na Aruba. San Nicolas a pasa den e desaroyonan cu resto di Aruba a pasa aden. San Nicolas hunto cu Savaneta ta forma e di 4 districto di Aruba. San Nicolas ta un districto mas di Carnaval y no “E” districto.