Home History of Aruba No crea identidadnan falso Historia di carnaval di Aruba ta skirbi caba...

No crea identidadnan falso Historia di carnaval di Aruba ta skirbi caba Parti 2

SHARE

Relato skirbi pa Celia Thiel, sociologa

Calypso y roadmarch

Despues di di dos guera mundial a bin hopi cambio. Mas tanto esnan cu tawata traha na e compania petrolero Lago, por a haya disconan cu nan por a toca. Entre otro tawatin e disco ”Brown skin girl” cu tawata un calypso. Lago tawata invita cantante di calypso pa Aruba y na 1946 a invita un di e promenan cu ta e Trinitario, Sir Lancelot Pinard. E a duna presentacion na San Nicolas y na Oranjestad.
Calypso a origina na Trinidad medio 1800, y ta folklore di Trinidad. E aspectonan socio-economico, cultural, educativo cu tawata hunga un rol den e bida di e catibonan a forma calypso. E aspectonan ey, no a tuma luga riba e suela di Aruba, consecuentemente, calypso no ta folklore, ni por bira folklore di Aruba. Na 1912 a graba e prome disco di calypso cu ta e cantica “Mango Vert”.Despues calypso a wordo exporta pa e otro islanan di Caribe y Venezuela.
Trinidad tawata celebra carnaval como fiesta di club y na fin di siglo 18 carnaval a bira fiesta di masa. Trinidad tin mas tempo cu e otro islanan cu carnaval di masa.
Na 1955 Padu Lampe (1920 – 2019) y Rufo Wever (1917 – 1977) a compone e prome calypso, cu tawata na Papiamento “Carnaval”. Si scucha e cantica aki bon, por haya e historia di carnaval pa Aruba. Mayoria di e otro cantantenan di habla ingles di calypso, a nace despues di 1930.
Calypso a yega Aruba pa medio di disco y presentacionnan ocacional cu refineria Lago tawata organiza, Lago a bin establece su mes na Aruba prome y despues na San Nicolas. Tur muscia cu a drenta Aruba pa medionan di audio, esta radio, y /of audio visual, esta cine y despues television, no ta folklore di Aruba paso e historia cu a forma e folklorenan aki, no a pasa riba suela di Aruba. Esaki ta conta pa musica Mexicano, merengue Dominicano, cumbia Colombiano, gaita y aguinaldo Venezolano.
Calypso no por ta folklore di Aruba y mucho menos por purba di inventa”calypso criyoyo”.
A uza calypso den carnaval pa fundraise. Na 1964 a cuminza cu e prome competencia di calypso. Na 1968 a saca di e mes competencia di calypso e miho roadmarch. Young Quik Silver a gana e competencia di calypso y Stringer Ray a gana cu e calypso “Burning she Momo” e prome roadmarch. E nombernan di Young Quik Silver y di Stringer Ray no ta e nombernan original di e persona . Trinidad ta uza e forma di cambio di nomber pa canta calypso. Aruba a copie. Poco poco, Aruba a bira un copia casi total di Carnaval di Trinidad.
Na 1969 Young Quik Silver a bira rey di calypso y Stinger Ray a gana e titulo di roadmarch, cu e calypso “She Panam Panam” y despues a separa e dos competencianan aki for di otro. Na Trinidad e cantantenan tawatin miedo cu nan lo perde calypso cu e popularidad di reaggue, pesey nan a introduci “soca”. E introduccion aki no tin nada di haber cu desaroyo di roadmarch na Aruba. Ta inaceptabel cu Aruba ta bolbe copia algo, totalmente los di su historia. Tawatin un tempo cu no ta balia e roadmarch den carnaval, sino e canticanan cu tawata popular pa carnaval. Na Aruba a dicidi, cu si no toca e roadmarch den parada, e banda no por sali banda di aña. Cu e decision aki, casi den henter e parada ta toca roadmarch y un par di cantica mas, te cu awe. Na Aruba “roadmarch” a desaroya otro, paso su historia ta otro y mester respeta esaki. Ta tristo cu esnan cu ta copia historia di Trinidad no ta ni origina di Trinidad.