Home Politics Prome Minister Evelyn Wever-Croes: Durante siman di celebracion di Dia...

Prome Minister Evelyn Wever-Croes: Durante siman di celebracion di Dia di Betico Prome Minister ta bishita diferente scol

SHARE

MUCHANAN DI PRINSES AMALIA BASISSCHOOL TAWATA HOPI CURIOSO PA CONOCE MAS DI BETICO
‘Danki na Dje’ ta e tema principal

Nos a drenta e siman na unda Aruba completo ta preparando pa celebra e fecha natal di un gran lider y estadista di nos pais, Gilberto François ‘Betico Croes’. Aruba ta recorda e balentia di un luchador incansabel cu a logra nos Status Aparte. Nos ta den momentonan of dianan na unda cu nos pueblo ta papia y conta di e gran Arubiano aki. Y na scolnan, esaki no ta diferente. Maestronan ta dedica oranan di dia pa siña nos muchanan e storia di Betico Croes.

Prome Minister Evelyn Wever-Croes, dialuna mainta a cuminsa cu un recorido na diferente scol basico na Aruba. Prome Minister a expresa su deseo di por a bishita tur scol na Aruba pero sinembargo pa motibo di tempo esaki no ta posibel pa cua motibo a scoge algun scol di tur bario na Aruba.

E tema di e aña aki ta ‘Danki na Dje’. Danki na Betico, despues di lucha duro, entrante 1 di januari 1986, Aruba a logra Status Aparte. Betico a hiba un lucha sagrado pa nos libertad. Esaki ta nos ehempel pa sigui gara nos bandera y sigui lucha pa libertad di nos pueblo. Danki Betico, danki pa tur e sacrificionan cu bo a haci pa logra realisa e soño di nos pueblo, nos Status Aparte. Betico sin miedo a enfrenta tur reto y obstaculo pa asina cumpli cu e deseo di su pueblo.

E prome scol cu a ricibi bishita di Prome Minister tawata Prinses Amalia Basisschool. E Primier di scol a wordo ricibi pa e directora di scol, alumnonan y docentenan di klas 6. E muchanan tawata tin un curiosidad pa haya sa mas tocante Betico Croes y a haci hopi pregunta na nos Prome Minister cu a sa di duna suficiente informacion di bida y logra di nos Libertador Betico Croes. Prome Minister a keda impresiona cu tur loke ya e muchanan tawata sa di Betico. Pa esaki, Prome Minister ta duna elogio na mayornan y na nos educadornan kendenan ta conta nos muchanan tocante Betico y loke cu e ta nifica den pasado, presente y futuro di nos pais.

Riba e pregunta, Kico Prome Minister lo a bisa Betico si esaki tawata na bida awe, Prome Minister a contesta cu e lo duna Betico danki pa su lucha pa logra nos Status Aparte y pa uni Aruba. Y tambe Prome Minister a expresa cu e lo a puntra constantementa pa conseho mirando su lucha y logronan pa nos pueblo.

Na final Prome Minister a invita tur mucha pa asisti na e Manifestacion Cultural diabierna awo, 24 di januari di 7:00 pa 10:30 PM na Plaza Libertador G.F. Betico Croes.