Parlamentario Endy Croes a comenta cu riba e prome dia di trabou di aña 2020 esta 3 di januari el a manda un total di 18 pregunta nobo pa AZV. Segun Croes tin indicacionnan cu AZV su gastonan operacional ta sigui aumenta y si nos no logra haci algo hunto, AZV lo “crash” den futuro. Desde mei 2019 Fraccion di MEP a reuni cu staff di AZV y e tempo ey a wordo splica cu AZV a caba di contrata un compania Hulandes pa haci un “In Depth Forecast Study for long Developments” cual lo dura algun luna. En bista cu nos a drenta 2020 cual porcierto lo bira e aña cu hopi enfoke riba AZV, Parlamentario Endy Croes a manda un serie di pregunta pa Minister di Salud Danqui Oduber alrespecto AZV pa pone e bala cuminsa lora.
Ley di AZV mester wordo cambia
Fraccion di MEP ta di opinion cu e ley di AZV mester wordo cambia. Actualmente di acuerdo cu e ley existente – manera un persona di exterior haya un permiso na DIMAS – e por inscribi na Censo y manera e inscribi na Censo e tin derecho riba AZV. Parlamentario Croes a duna ehempel di mayoria pais rond mundo unda un studiante of empleado cu permiso mester cumpra nan propio seguro. Mi propio yiunan cu a studia of ta studiando na Merca y Hulanda mester cumpra nan seguro pa nan wordo acepta na scol.
Di acuerdo cu informacion ricibi tin rond di 18 mil persona cu permiso inscribi na AZV. No kier crea panico of trece informacion robes. Esnan cu ya ta inscribi lo keda inscribi. Pensamento si ta cu manera cambia e ley esnan nobo cu inscribe, despues cu e ley drenta na vigor, desde e fecha ey en adelante mester por demostra cu nan tin un seguro basico cual ta cubri nan gastonan medico y di hospital den nan poder prome cu nan por haya e permiso final.
Un otro ehempel. Actualmente un miyonario ta cumpra un cas na Aruba y ta haya un verblijfsvergunning. Cu e verblijfsvergunning aki e miyonarionan por ehempel cu tin un cas den Tierra Del Sol ta bay inscribi na Censo y nan tambe mesora ta haya 100% derecho riba AZV sin cu nan ta paga premie di AZV. Esaki tampoco di acuerdo cu Parlamentario Croes no por. Un miyonario mester por tin su seguro pa demostra cu e ta sigura prome cu e haya su verblijsfvergunning.
2020 mester ta aña di AZV
Gastonan operacional di AZV a surpasa 400 MIYON pa aña y ni cuanto keda subi e BAZV – unda pueblo lo mester bolbe paga – esaki no lo bay controla e situacion pa futuro. Den preguntanan pa AZV, Parlamentario Endy Croes a urgi Minister Danqui Oduber pa formalisa e comision ainda den luna di januari kendenan lo bay revisa e Ley di AZV pa cuminsa e ehercicionnan necesario pa trece cambionan den Ley sin cu mester afecta e calidad di cuido.
Tambe Endy Croes a haci un pregunta riba preocupacion cu CAFT a señala riba AZV den nan reaccion di 2 di september 2019 na Gobierno. Gobierno a reacciona bisando cu nan lo laga haci un doorlichting den AZV. Croes a haci pregunta si esaki a tuma lugar caba den 2019. Endy Croes ta termina bisando cu e tempo a yega y e aña aki ta e aña di AZV. Boluntad comun den combinacion cu curashi tin mester pa hunto nos haci e cambionan efectivo pa por tin un AZV sostenibel pa futuro. Nos ta keda en espera di contestanan cu a bay pa Minister di Salud pa asina por inicia e proceso aki.