Un homber di edad basta hoben den un parke cerca di Paris a cuminsa ataca personanan cu tabata cana den e parke cu cuchiu, e tabata grita “Allah Akbar” (cual ta kemen Dios ta grandi)
Villejuif, Paris, Francia: Diabierna den careda di 2’or di merdia ta sosode un caso hopi tristo, e hoben Nathan C. di 22 aña, cu un cuchiu den su poder ta cuminsa ataca varios persona den e parke.
Durante un conferencia di prensa e procureur Laure Beccua a declara cu un di e victimanan di Nathan C. a fayece, tabata trata di un homber cu a ricibi un hinka fatal, cu ela ricibi na momento cu ela trata na scapa su señora di ricibi mas hinka. E señora y un otro dama ta gravemente herida ambos ta den dos diferente hospital luchando pa nan bida. Hopi otro hende a core pa asina scapa di wordo hinka door di Nathan.
Nathan C. no a ataca e prome persona cu a pasa su dilanti, pa motibo cu na e momento cu ela bisa Allah Akbar, e homber a conteste cu e ta Moslim y e homber a cuminsa resa un oracion. Dje Nathan a sigui pa asina busca otro victima, e tabata determina pa hinka hende. Asina e procureur a duna di conoce.
Nathan C. a wordo tira fatalmente pa polis. Segun su mama e tin problemanan mental, tambe e mama a splica cu ta for di su 5 aña, e ta sufriendo di esaki. Na e luna di Mei, su tratamentonan a stop.
Despues di un investigacion, a bin sali na cla cu e hoben aki enberdad tabata sufriendo di un trastorno mental grandi.Tambe cu e sospechoso aki tabata actuando hopi radical den e forma cu e tabata agredi su victimanan.
