Boegoeroei: Diahuebs den oranan di marduga a sosode un caso di “Hit & Run” riba e caminda principal di Boegoeroei na Noord, esaki a sosoden net na e crusada banda di e edificio di Berloni, mesora a pidi pa presencia di polis.
Na yegada polis a bin compronde cu un Nissan Cube blanco, tabata biniendo di for di direccion panort riba e caminda principal y na dado momento un auto, Mazda Axela, color shinishi a sali su dilanti sin dun’e preferencia, aparentemente e chauffeur no tabata ni pone tino riba caminda.
E chauffeur di e Mazda a dal e Nissan Cube y a sigui core mane nada no a pasa, lagando e Nissan Cube cu basta daño material atras.
Despues di un rato nan a bin topa cu e Mazda na altura di Fermins Bar. E dama chauffeur tabata mustra basta bou influencia, e no por a ni para riba su dos pianan. Ela cuminsa insulta polis, mesora e agentenan policial a tuma e desicion di detene pa core auto bou influencia, pa ocasiona accident y bandona e sitio y tambe pa falta polis respet den ehecucion di su funcion.
Mesora a pidi pa un transportwagen di polis, e dama chauffeur a wordo transporta cu transportwagen pa warda di polis, caminda elo haya un camber gratis y mester bay duna cuenta di loke ela haci.
E chauffeur di e Cube cu tambe tabata un dama a keda herida y a wordo transporta cu ambulance pa hospital.
