Home Local 780,000 hende di mas cu 112 pais a selecciona nomber pa exoplaneta...

780,000 hende di mas cu 112 pais a selecciona nomber pa exoplaneta en conexion cu celebracion di 100 aña di existencia di International Astronomical Union.

SHARE

PARIS – 17 di december 2019 ultimo a tuma luga na e presentacion di mas cu 112 set di nomber di exoplaneta y nan solo. Esaki ta en conexion cu celebracion di e di 100 aña di existencia di International Astronomical Union (IAU). E campaña NameExoWorlds a culmina cu e anuncio via un conferencia di prensa na Paris. Durante 2019 diferente pais cu ta miembro di IAU tabatin e oportunidad pa organisa un competencia pa nombra un exoplaneta cu su solo pa asina stimula e participacion directo di mas cu 780,000 hende rond di mundo.

E proyecto di IAU100 NameExoWorlds a mira un participacion masivo mundialmente, caminda e publico en general cu hopi entusiasmo a participa na e oportunidad unico aki pa duna un sistema solar un nomber.
E publico di Aruba a propone un total di 33 nomber cu ta representa nos dushi pais Aruba, cu cientificonan lo uza mundialmente. E proposicionnan ricibi a pasa door di un comite nacional di hurado cu ta consisti di dos arkeologo, un docente di Papiamento y un artista local. A selecciona un total di 11 nomber y e publico Arubano por a deposita nan voto. Esaki ta e di dos biaha den historia cu IAU ta duna e oportunidad pa pais cu ta miembro duna publico e oportunidad pa duna un obheto celestial un nomber. Mundialmente a drenta 360,000 proposicion y 420,000 hende a vota pa e nomber preferi pa nan pais. E proyecto aki lo tin un impacto permanente pa Aruba mirando cu e nomber ganado na prome luga, lo keda uza banda di e nomber cientifico di e exoplaneta. Si cita e nomber, lo uza e nomber di e persona cu a gana den literatura cientifico tambe.

E nombernan ganado pa Aruba ta lo siguiente:

Na prome luga Nomber di strea Malmok, nomber di exoplanet Bocaprins, crea door di Roselly Everon
Na di dos luga Nomber di strea Trom, nomber di exoplanet Bongo crea door di Nando Mullers
Na di tres lugar Nomber di strea Caiquetio, Nomber di exoplanet Crioyo crea door di Ronaly van der Biest
Den nomber di Space and Nature Aruba Foundation y e Comision Nacional pa seleccion di e nombernan, nos kier a duna un palabra di pabien na e ganadornan.
Entregamento di premio lo tuma lugar dia 18 di Januari 2020 na Parke Nacional Arikok pa 8or di anochi.

E anochi lo cuminsa cu un splicacion di kico ta un exoplaneta, sigui pa entregamento di premio. Despues tin oportunidad pa admira potret di e miembronan di Space and Nature Aruba Foundation cu lo keda exponi na Parke Nacional Arikok desde Januari