Parlamentario Alan Howell durante conferencia di prensa a felicita Kustwacht cu e gran accion cu nan a haci durante fin di siman. Ora nan tabata patruya, nan a detecta un barco navegando den nos awanan y a topa un cantidad di 35 persona cu tabatin intencion di drenta nos pais den forma ilegal.
E tipo di accionnan aki ta un muestra claro di e importancia di por conta cu Kustwacht pa patruya nos costanan, Howell a duna di conoce.
Na mes momento el a menciona e bon cooperacion di Cuerpo Policial y Kustwacht den e caso aki unda cu asina a yega tera, e personanan cu a purba drenta ilegal a wordo deteni. A menciona tambe cu por a tende for di Minister di Husticia, Andin Bikker, cu lo charter un avion pa e personanan aki wordo manda nan pais bek. “Esaki ta e forma cu nos tin cu sigui traha y sigui cuida nos pais”, Alan Howell a indica.
Siguiendo riba e tema di ilegalidad, e parlamentario di POR a expresa cu ta importante pa Guarda Nos Costa y Cuerpo Policial haci un investigacion di unda e ilegalnan cu ta logra drenta nos isla ta keda y di ken nan ta haya cooperacion pa keda Aruba. E ta considera esaki un topico interesante pa gobierno atende cune, pasobra na ningun caminda por haya ileganan drumi riba caya y no ta scucha tampoco cu nan no tin caminda di keda.