“Minister Romero sumamente orguyoso y contento cu e determinacion di nos Agricultornan
pa sigi produci y comparti nan experticio cu otronan te na edad grandi”
Recientemente Minister Chris Romero tabata di bishita cerca sr. Juan Alberto Croes, conoci como Bebe Croes. Sr. Bebe Croes no ta un persona desconoci den nos comunidad y sigur no den e mundo di Horticultura local. Sr. Croes semper ta cla pa contribui cu Santa Rosa na momento cu e Departamento tin mester di Pisca pa regenbak, of te hasta simiya di diferente producto local. Su consehonan semper a contribui pa yuda hopi otro cunukero, cu te ainda ta pasa bishit’e.
Durante su trayectorio como Horticultor, sr. Bebe Croes a logra planta y cosecha un cantidad di producto manera: paksoi, amsoi, warmoes, spinashi, wintermelon, kouseband, jambo, concomber (sweet slice), concomber chikito, pampuna, promenton, selder, promente pica, Madam Janet (geel y cora), bonchi bonovis, calbas largo, papaya, tiger blad, tomati chikito y mediano, tomati di Hulanda, diferente tipo di lechuga, batata dushi, bonchi “rementa smoel”, yerb’i hole, melon di Aruba, patia di Aruba, cebollin (chives), menta, lamunchi y mamotica, entre otro.
Den su hofi yena cu mata y flor den tur color, Minister Romero y sr. Croes a sinta y combersa pa un rato basta largo. Nan a papia ampliamente riba sr. Bebe Croes su inicio den e ofishi di plantamento y con, apesar di tabatin su responsabilidadnan como Analista den e laboratorio di LAGO, Sr. Croes a mantene su pasion pa plantamento activo.
Sr. Bebe Croes a comparti cu Minister Romero su experiencia como mucha tempo cu e tabata planta cu su tata. Un tradicion cu el a sa di mantene y traspasa pa su 3 yui muhe. Sr. Croes tabatin un cantidad di potret pa cu comparti cu Minister Romero, haciendo asina un intercambio di información basta placentero pa ambos. Aki sr. Bebe Croes a papia y haci un comparación riba e agricultura di pasado compara cu e agricultura actual.
E mainta a bay den un forma sumamente ameno. E famia di sr. Bebe Croes a sigura cu Minister Romero a sinti’e na cas y hunto cu Director di Santa Rosa, sra. Nathalie Maduro, a entama un combersacion referente e diferente proyectonan escolar cu Ministerio di Sector Primario, mediante Santa Rosa/DLVV, ta preparando pa efectua den un futuro cercano. Sr. Bebe Croes ta di opinion cu “mester stimula nos muchanan pa nan planta mas”.
Sr. Bebe Croes a keda sumamente satisfecho cu e bishita di Minister Chris Romero y a aprecia e gesto di e mandatario, kende a gradici sr. Croes pa tur su esfuerso y dedicacion na Aruba su Sector Primario, como tambe a resalta su contribucion durante tur e añanan como Horticultor. “Nos mester sa di aprecia nos grandinan, kendenan a traha duro den un sector asina importante y cu ainda awe ta sigi aporta cu nan conocemento den un forma asina positivo”, tabata palabranan di e Titular di e Cartera di Sector Primario, sr. Chris Romero. Di e manera aki ta duna reconocimento na e bunita trabou y gran aporte cu personanan manera sr. Croes, y hopi otro cunukeronan di Aruba cu a sa di mantene e cultura di plantamento bibo y a sigui pasa esaki pa otro generacionnan.